Президенти Ӯзбекистон Шавкат Мирзиёев зимни суханронӣ дар иҷлосияи маҷлиси вакилони халқи вилояти Тошканд изҳор дошт, ки Ӯзбекистон муносибатҳои ҳамҷаворӣ бо Тоҷикистонро барқарор хоҳад кард, зеро «ҳамсояи номеҳрубонро баъди марг касе намебахшад». Дар ин бора барномаҳои иттилоотии шабакаҳои давлатии телевизиони ин кишвар хабар доданд.

Президенти Ӯзбекистон қайд кардааст, ки ба наздикӣ бо сафари расмӣ ба Тоҷикистон рафта, дар ҷараёни он ҷонибҳо созишномаҳои зиёдеро ба имзо мерасонанд.

Шавкат Мирзиёев ҳамчунин гуфтааст, барои омодагии сафари расмии ӯ ба Тоҷикистон сарвазири Ӯзбекистон Абдулло Орипов рӯзҳои наздик ба Душанбе меравад.

«Мо созишномаҳои зиёд баимзо мерасонем, алоқаи роҳи оҳан ва низоми ягонаи энергетикиро барқарор намуда, бисёр масъалаҳои дигарро низ баррасӣ хоҳем кард», - изҳор доштааст президенти кишвари ҳамсоя.

Ӯ зикр кардааст, ки «вақте ки муносибатҳо бо ҳамсоякишварҳо беҳбудӣ мехоҳанд, роҳандозии ҳамкориҳо бо кишварҳои хориҷи дур мушкилтар мешавад». «Мо ҳама мирандаем ва набояд фаромӯш кард, ки ҳамсояи номеҳрубонро баъди марг касе намебахшад», - гуфтааст Мирзиёев.

Дар идома ӯ илова кардааст, ки Ӯзбекистон муносибатҳояш бо ҳамсоякишварҳоро беҳтар хоҳад кард: «Ҳарчанд об кардани яхи 20-сола осон набошад ҳам, вале зарур аст».