Бозии дуюми даври гурӯҳии мусобиқаи Чемпионати Осиё-2018 оид ба футбол дар Индонезия байни мунтахаби ҷавонони Тоҷикистон (U-19) ва дастаи Индонезия мусовӣ – бо ҳисоби 2 бар 2 анҷом ёфт.

Тӯби аввалро футболбозони Малайзия ба нишон расонида, сипас то охири қисми якуми вохӯрӣ футболбозони тоҷик ду тӯбро вориди дарвозаи ҳариф намуда, ба пеш баромаданд, лекин дар дақиақаи 55-уми бозӣ ба футболбозони Малайзия муяссар шуд, ки ҳисобро баробар кунанд.

Дақиқаҳои охири бозӣ бо ҳамлаҳои футболбозони тоҷик сурат гирифта, вале ҳисоб дигар тағйир наёфт. Ғайр аз ин, дар дақиқа 83-юми вохӯрӣ футболбози мунтахаби Тоҷикистон Зиёвиддин Фузайлов ҷароҳати вазнин гирифт.

Ҳамин тариқ бо касби 4 хол баъди ду бозӣ дастаи Тоҷикистон дар гурӯҳи “D” зинаи дуюмро ишғол мекунад. Дастаи пешсаф дар ин гурӯҳ Арабистони Саудӣ мебошад, ки бо касби 6 имтиёз роҳхат ба даври минбаъдаро ба даст овард.

Дар вохӯрии даври сеюм, ки санаи 26 октябр доир мегардад, дастаи Тоҷикистон бо тими Арабистони Саудӣ ва Малайзия бо дастаи Чин бозӣ карда, маҳз аз натиҷаҳои ин вохӯриҳо маълум хоҳад шуд, ки кадом даста ба роҳхати дуюм ба даври плей-офф аз ин гурӯҳ соҳиб мешавад. Оғози бозиҳо соати 17:00 бо вақти Душанбе.

Аз рӯи низомнома аз ҳар гурӯҳ ду дастаи беҳтарин ба бозиҳои ¼- ниҳоӣ роҳхат мегиранд. Дар сурати ба даври минбаъда баромадани дастаи мунтахаби Тоҷикистон футболбозони мамлакат бо яке аз дастаҳои гурӯҳи “С” (Ветнам, Кореяи Ҷанубӣ, Австралия ва Урдун) вориди рақобат мешаванд.

Қобили зикр аст, ки 4 дастаи беҳтарини Чемпионати Осиё-2018 ба бозиҳои финалии Чемпионати ҷаҳон-2019 (U-20), ки дар Полша доир мегардад, иштирок мекунанд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.