Дар робита ба истеъфои роҳбари хадамоти амнияти миллии Ӯзбекистон Рустам Иноятов сиёсатшиноси тоҷик Абдуғанӣ Мамадазимов изҳор намуд, ки Иноятов натанҳо сиёсати дохилии кишвар, балки муносибатҳои Тошканд бо ҳамсоякишварҳои минтақаи Осиёи Марказиро низ муайян мекард.

«Рустам Иноятов доир ба роҳандозии муносибатҳо бо кишварҳои минтақа назари худро дошт, ки ба сиёсати президенти нави Ӯзбекистон Шавкат Мирзиёев созгор набуд, зеро аз аз замони сари мансаб омадан сарвари нави Ӯзбекистон изҳор дошт, ки роҳандозии муносибатҳои мутақобилан судманд бо давлатҳои минтақа - Тоҷикистону Туркманистон ва Қирғизистону Қазоқистон афзалияти асосии сиёсати хориҷии кишвар хоҳад буд», - гуфт сиёсатшинос дар мусоҳиба ба «Азия-Плюс».

Ба гуфтаи ӯ, генерал-полковник Рустам Иноятов бо баҳонаи мубориза бо терроризм, ифротгароӣ ва дигар зуҳуроти хатарнок ислоҳоти ҷоримешуда аз ҷониби Мирзиёев дар сиёсати дохилӣ ва хориҷии кишварро боздошта метавонист.

Сиёсатшинос муътақид аст, ки ба истеъфо рафтани роҳбари Хадамоти мнияти миллии Ӯзбекистон ба ҷараёни амалисозии сиёсати Мирзиёев нисбати кишварҳои ҳамсоя суръат мебахшад.

Ба ақидаи сиёсатшинос ва журналисти  тоҷик Нуралӣ Давлат, муддати беш аз 20 соли роҳбарӣ ба Хадамоти амният Рустам Иноятов «давлат дар дохили давлат»-ро бунёд кард.

Нуралӣ Давлат бар ин назар аст, ки Иноятов «давлат дар дохили давлат»-ро бунёд кард.
Акс аз Asia-Plus

«Иноятов дастпарвардаи Кумитаи бехатарии давлатии Иттиҳоди Шӯравӣ буда, таҷрибаи кори ин ниҳод дар масъалаҳои роҳандозии таъқиботи сиёсӣ, пулиси махфӣ, назорати сартосарии шаҳрвандонро дар Ӯзбекистон ҷорӣ намуд», - қайд кард коршинос.

Нуралӣ Давлат бар ин назар аст, ки маҳз Иноятов бо роҳандозии таҷрибаи ҷустуҷӯи «душманони кишвар», ба мардум воҳимаву ҳаросро талқин карда, дар сароғози ба сардӣ гароидани муносибатҳои Тошканди расмӣ бо кишварҳои минтақа низ ӯ даст дошт.

Ёдрас мекунем, ки Рустам Иноятов санаи 31 январ аз мансаби раиси Хадамоти амнияти миллии Ӯзбекистон сабукдӯш шуда, ҳуди ҳамин рӯз ба вазифаи мушовири президент оид ба масоили сиёсӣ- ҳуқуқӣ таъин шуд. Ӯ муддати беш аз 22 сол вазифаи роҳбари Хадамоти амнияти миллии Ӯзбекистонро бар дӯш дошт.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.