Қариб 95%-и аз ҳаҷми умумии қарзи хориҷии Тоҷикистонро воситаҳои ҷалбшуда ба эҳтиёҷоти ҳукумати ҷумҳурӣ ташкил медиҳад.

Ҳаҷми қарзи бевоситаи давлатӣ, ки ба иҷрои уҳдадориҳои ҳукумат марбут аст, ба санаи 1 июли соли ҷорӣ 2 млрд. 743 млн. долларро ташкил дод, хабар медиҳад Вазорати молияи ҶТ. Маблағи умумии қарзи хориҷии Тоҷикистон дар ин давра бошад, ба 2 млрд. 893 млн. доллар баробар шудааст.

Боқимонда 5% дар сохтори қарзи хориҷӣ ба таври зайл тақсим шудааст:

- қарзи ҷалбшудаи Бонки миллии Тоҷикистон (БМТ) аз Хазинаи байнулмилалии асъор барои нигаҳдории мувозинати пардохтҳо – 71,6 млн. доллар;

- қарзи ҷалбшудаи БМТ аз Чин - 7 млн. доллар;

- қарзи ҷалбшудаи БМТ аз Бонки исломии рушд – 3,6 млн. доллар;

- қарзҳо бо кафолати давлатӣ - 36,6 млн. доллар;

- қарзи корхонаҳое, ки кафолати давлатӣ надоранд - 31,5 млн. доллар.

Қарзи хориҷӣ афзуд

Ҳаҷми қарзи хориҷии Тоҷикистон аз оғози сол ба миқдори 14 млн. доллар афзуд. Аввали сол он 2 млрд. 879 млн. долларро ташкил медод, ки ба 40,3%-и ҳаҷми Маҷмӯи маҳсулоти дохилии кишвар баробар буд.

Пардохти қарзи хориҷӣ нимсолаи аввали соли ҷорӣ ба маблағи 90,6 млн. доллар сурат гирифт. Давоми соли равон ҷалби 200 млн. доллар қарзи хориҷӣ ба нақша гирифта шудааст.

Ҳамчунин эҳтимоли ҷалби сармоя аз ҳисоби фурӯши коғазҳои қиматноки давлатӣ дар бозорҳои байнулмилалӣ низ мавҷуд аст.

Ба киҳо қарздорем?

Қарздиҳандаи асосии хориҷии Тоҷикистон “Эксимбонк”-и Чин боқӣ мемонад, ки ҷумҳурӣ ба ин ниҳод беш аз 1,2 млрд. доллар қарздор аст. Қарзи ташааккулёфта дар натиҷаи фурӯши коғазҳои қиматноки давлатӣ дар бозорҳои байнулмилалӣ 500 млн. долларро ташкил медиҳанд. Ҳамчунин қарзҳои нисбатан зиёд назди Бонки ҷаҳонӣ (318 млн. доллар), Бонки рушди Осиё (278 млн. доллар) ва Бонки исломии рушд (112 млн. доллар) низ вуҷуд доранд.

Тоҷикистон аз Фонди Саудии рушд, Фонди рушди Кувейт, Фонди зиддибуҳронии ЕвразЭС, Фаронса, Олмон, Бонки аврупоии таҷдиду рушд, Фонди аврупоии сармоягузорӣ ва Фонди Абӯ-Дабӣ низ қарзҳои начандон зиёд дорад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.