Тибқи маълумоти ахир, аз ин ҳодиса 6 нафар шаҳрвандони Тоҷикистон осеб дидаанд, ки 2 нафарашон дар ҷойи ҳодиса ва ду тани дигар дар бемористон ҳалок шудаанд, хабар медиҳад РИА Новости.

Бино ба иттилои сомонаи КрасногорскOnline, нимаи рӯзи 28 январ дар яке манзилҳо дар хонаҳои истиқоматии баландошёна дар шаҳри Красногорски вилояти Маскав сӯхтор сар мезанад.

Дар Вазорати ҳолатҳои фавқулода гуфтаанд,  оташ майдони 50 метри мураббаъро фаро гирифта, ба хомӯш кардани он 44 нафар ҳайати шахсии дастаи оташнишонон ва 13 адад техника сафарбар шудааст.

Тибқи маълумоти ахир, бар асари ин ҳодиса 4 нафар - ду шахси калонсол ва ду кӯдак ба ҳалокат расидаанд. Падар бо ду кӯдакаш худро аз тирезаи ошёнаи 6-ум ба берун мепартоянд. Онҳоро дар ҳолати вазнин ба бемористон бурда, баъди чанде мард вафот мекунад. Зан аз дуд заҳролуд шуда, ҳалок мешавад. Ҷасади 1 кӯдак дар хонаи оташгирифта дарёфт мегардад.

Се тан аз ҷабрдидагон - зан ва ду кӯдак ба бемористони шаҳри Красногорск интиқол меёбанд. Тибқи маълумоти Вазорати тандурустии вилояти Маскав, осебдидагон дар ҳолати хеле вазнин қарор доранд. Шомгоҳон маълум шудааст, ки як кӯдаки дигар низ дар бемористон ҷон додааст.

Гуфта мешавад, ҳолатҳои рух додани ҳодиса мавриди таҳқиқ қарор дошта, тибқи баъзе маълумот сабаби сӯхтор таркиши балони газ аст. Навбатдор соати 12:50 дақиқа занг дар бораи сӯхторро қабул карда, баъди 50 дақиқа он хомӯш карда шудааст. Аз ин хонаи истиқоматии баландошёна 135 нафар ба берун бароварда шудаанд.

Зикр мегардад, ки дар ин хона 9 нафар зодагони Тоҷикистон иқомат дошта, се нафарашон кӯдакон будаанд. Ҳузури қонунии онҳо дар қаламрави Русия санҷида мешавад. Бар асари сӯхтор зану кӯдакаш дар ҷойи ҳодиса ва баъдтар марду писари ноболиғаш ҳалок шудаанд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.