Президенти Тоҷикистон Эмомалӣ Раҳмон имрӯз, 27 октябр бо сафари корӣ ба вилояти Хатлон ташриф овард.

Бино ба иттилои хадамоти матбуоти сарвари давлат, зимни сафар президент бо рӯзгори мардум аз наздик шинос шуда, дар маросими ифтитоҳи иншооти таъиноти гуногун иштирок мекунад ва бо намояндагону фаъолон ва қишрҳои гуногуни аҳолӣ дидору мулоқот мекунад.

Гуфта мешавад, дар Фурудгоҳи байналмилалии Бохтар Эмомалӣ Раҳмонро раиси вилояти Хатлон Қурбон Ҳакимзода ва дигар шахсони расмӣ гарму самимӣ истиқбол гирифтанд.

Дар шаҳри Бохтар президент нахуст Маркази перинаталии вилояти Хатлонро мавриди баҳрабардорӣ қарор дод. Муассисаи нави соҳаи тандурустӣ аз 3 ошёна иборат буда, дорои 10 шуъба, аз ҷумла шуъбаҳои қабул, ташхис, таҳлилгоҳ, модару кӯдак, таваллуд, амалиёти ҷарроҳӣ ва эҳёи калонсолон мебошад.

Эмомалӣ Раҳмон бо мақсади боз ҳам беҳтару хубтар расонидани ёрии босифати тиббӣ ба беморон ба Маркази перинаталии вилояти Хатлон як автомашинаи ёрии таъҷилӣ туҳфа кард.

Дар идома дар маҳаллаи Зархези шаҳри Бохтар бо ҳузури сарвари давлат Муассисаи ғайридавлатии таълимии “Макбати хусусии инноватсионӣ” ба истифода дода шуд. Муассисаи таълимии хусусӣ аз таҳхона, 6 ошёна, 22 синфхона, 5 лаборатория, ҳуҷраҳои корӣ барои омӯзгорон ва дигар иншооти ёрирасон иборат мебошад.

Мактаби замонавӣ аз ҷониби оилаи Назризодаҳо барои 480 хонанда дар як баст бунёд гардида, раванди таълим дар он бо забонҳои тоҷикӣ, русӣ ва англисӣ ба роҳ монда шудааст. Айни замон дар муассисаи нави таълимӣ 300 нафар хонанда дар се зина ба таҳсил фаро гирифта шудаанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.