Соҳибкор Абдураҳим Бобоҷонов, маъруф бо тахаллуси “Раҳими Ғармӣ” ба сокинони махсусан ниёзманди Тоҷикистон 20 манзил ҳадя кард. Дар ин бора блогнависи тоҷик Орзу Исоев, ки дар маросими ироаи асноди манзил ба ин афрод ширкат дошт, хабар дод.
Маросим дар тарабхонаи "Бурак" дар фазои бошукӯҳ баргузор шуд ва ин чорабинӣ ба гуфтаи сарпараст, ба Рӯзи Ваҳдати миллӣ рост омад.
Абдураҳим Бобоҷонов дар сӯҳбат бо блогнавис гуфт, ки хайрия барои ӯ як ҷузъи муҳими зиндагиаш аст.
«Одамоне, ки манзили шахсии худро надоранд, бо ин мушкилот аз дунё канор мераванд, нигоҳи холӣ ва хаста доранд. Ман худам як вақт мушкили манзилро аз сар гузарондам, дур аз Ватан зиндагӣ мекардам, иҷора менишастам, аз ин рӯ мефаҳмам, ки ин чӣ гуна мушкили бузург аст." - гуфт ӯ.
Ӯ ҳамчунин қайд кард, ки дар интихоби "номзадҳо" ба ӯ кормандон, блогнависон ва ҳатто модараш кӯмак кардаанд.
«Мо рӯйхат тартиб дода, онро ба се гурӯҳ тақсим кардем: ниёзмандон, ниёзмандтарҳо ва ниёзмандтаринҳо. Мо тасмим гирифтем, ки барои эҳтиёҷмандон манзил бихарем”, - қайд мекунад хайрхоҳ.
Ёдовар мешавем, ки қаблан Бобоҷонов барои ду ҳунарманд - ҳунарманди гурӯҳи ҳаҷвии "Ғарибшо-компания" Бахтиёр Раҳимов ва солисти гурӯҳи ҳаҷвии "Хандинкамон" Гулбаҳор Ғаффорова манзил харида буд.
Онҳо пас аз он ки барои ёрӣ ба хайрхоҳони мамлакат мурочиат карданд, соҳиби хона шуданд.
Аз ҷумла Бахтиёр Раҳимов ба Абдураҳим Бобоҷонов, Исмоил Муҳаммадзоир ва Маҳмуд Муродов муроҷиат кард. Дар натиҷа Абдураҳим Бобоҷонов ба дархости ӯ посух дода, барои хариди манзил 60 ҳазор доллар ҷудо кард.
Раҳим Бобоҷонов пеш аз ин бо саховатмандиаш ном бароварда буд. Ӯ дар Русия тиҷорат дошта, на як бору ду бор ба ҳамватанонаш кӯмаки моддӣ кардааст.
Ӯ дар замони пандемия ба 600 муҳоҷири кории тоҷик, ки бекор буданд, ба маблағи 3 миллион рубли русӣ кумаки моддӣ карда буд.
Соли гузашта низ соҳибкор пас аз баромади муваффақи варзишгари тоҷик Нурулло Алиев дар мусобиқаи Eagle FC ба ӯ мошини нав ҳадя карда буд. Ин ғалабаи шашуми ҷанговар буд.
Падари Раҳим, Муҳиб Бобоҷонов низ тоҷири маъруф аст. Дар гузашта ба совхози «Сорбоғ»-и дараи Камароби ноҳияи Рашт роҳбарӣ мекард. Сипас ширкати шахсии Исфандиёрро таъсис дод.
Хонаводаи Бобоҷоновҳо дар соли 2019 қисмати шоҳроҳи Навобод-Ғарм дар минтақаи Раштро асфалтпӯш карданд. Худи ҳамон сол Муҳиб Бобоҷонов бо ордени «Барои хизматҳои шоён» мукофотонида шуд.
Руcский