Қурби расмии доллари амрикоӣ нисбат ба арзи миллии Тоҷикистон тайи моҳи ахир қариб 5,3% боло рафта, устувор шудани мавқеи доллар идома дорад.

Бонки милии Тоҷикистон имрӯз, 16 апрел қурби долларро нисбат ба пули миллӣ 10,24 сомонӣ барои 1 доллар муқаррар кард.

Ҳанӯз нимаи моҳи март қурби асъори амрикоӣ 9,70 сомониро ташкил дода, охири моҳи гузашта аллакай ба 10,2 сомонӣ расид.

Пас аз моҳи март босуръат поинравии қурби рубл, айни замон мавқеи он устувор мешавад: қурби расмии рубл нисбат ба сомонӣ аз 0,128 сомонӣ (барои 1 рубл) дар нимаи моҳи март имрӯз то ба 0,136 сомонӣ боло рафт.

Дар ҳамин ҳол, марказҳои бонкии мубодилаи асъор аллакай як моҳ инҷониб қариб ки умуман доллару рубл намефурӯшанд. То ин дам дарёфти асъори нақд дар ҳаҷми маҳдуд дар баъзе бонкҳо имкон дошт.

Кормандони марказҳои бонкӣ ин вазъро ба он вобаста медонанд, ки аз мизоҷон чунин асъор намегиранд.

“Мо танҳо асъореро фурӯхта метавонем, ки аз дигар мизоҷон гирифтаем. Чунин мизоҷон айни замон нестанд ва мутаносибан мо ҳам чунин асъор надорем”, - гуфт корманди яке аз чунин марказҳо.

Ӯ зикр кард, ки айни замон аз ҷониби Бонки миллӣ барои нигоҳдории бозори нақди асъор ҳеҷ гуна дахолат (интервенсия) анҷом дода намешавад.

Дар Бонки миллӣ камбуди асъорро ба афзоиш ёфтани тавозуни манфии савдои кишвар, коҳишёбии вуруди интиқолҳои пулӣ дар ин давра ва вобаста ба ин кам шудани пешниҳоди асъори хориҷӣ дар бозор нисбат медиҳанд.

Ҳамчунин дар Бонки миллӣ ба таъсири вазъи кунунии ноустувори иқтисоди ҷаҳон ба иқтисоди кишвар ишора мешавад.

Гуфта мешавад, Бонки миллии Тоҷикистон бо тамоми масъулият вазъияти сиёсати қурбиро зери мушоҳидаю таҳлил ва назорат қарор дода, барои таъмин кардани суботи бозори дохилии асъор ва муътадил нигоҳ доштани қурби пули миллӣ воситаю имконият ва захираҳои заруриро истифода менамояд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.