Дар шаҳри Душанбе таҳти раёсати Раиси Ҳизби Халқии Демократии Тоҷикистон Эмомалӣ Раҳмон маҷлиси Кумитаи иҷроияи марказии Ҳизби Халқии Демократии Тоҷикистон (ҲХДТ) баргузор гардид.
Бино ба ттилои АМИТ «Ховар», дар кори маҷлис аъзои Кумитаи иҷроияи марказии ҳизб, намояндагони фраксияи ҳизб дар Маҷлиси намояндагони Маҷлиси Олии ҶТ, раисони шаҳру ноҳияҳо, роҳбарони ташкилотҳои ибтидоию ҷамъиятии ҳизбӣ ва дигар аъзои ҳизб иштирок карданд.
Маҷлисро бо сухани муқаддимавӣ Раиси ҲХДТ Эмомалӣ Раҳмон оғоз карда, дар масъалаи рӯзнома оид ба фаъолияти ҲХДТ дар соли 2016 ва вазифаҳои нави ташкилотҳои ҳизбӣ дар соли 2017 бо таҳлилҳои мушаххас суханронӣ кард.
Зимни суханронӣ Эмомалӣ Раҳмон вобаста ба вазъи ҷаҳони муосир, раванди ҷаҳонишавӣ ва таъсири он андешаронӣ карда, таъкид дошт, ки амалигардонии ҳадафҳои созандаи Ҳукумати Тоҷикистон, иҷрои нишондодҳои Паёми навбатии Президенти Тоҷикистон ба Маҷлиси Олӣ, татбиқи барномаҳои давлатӣ, таъмини амният ва суботи сиёсӣ, ҳифзи истиқлолият, арҷгузорӣ ба муқаддасоти Ватан бояд вазифаи муқаддаси ҳар як фард бошад.
Раиси ҳизб вобаста ба амалӣ гардонидани ғояҳои сиёсӣ ва ҳадафҳои барномавии ҳизб, таҳкими истиқлолияти сиёсӣ, иқтисодӣ, иҷтимоӣ ва фарҳангии мамлакат дар соли 2017 дар назди аъзои ҳизб вазифаҳои мушаххас гузоштанд.
Баъди суханронии Раиси ҳизб дигар аъзои ҳизб- Гулбаҳор Назирӣ — муовини роҳбари фраксияи ҳизб дар Маҷлиси намояндагони Маҷлиси Олии ҶТ, Гулизор Пирова — донишҷӯйи Донишгоҳи давлатии тиббии Тоҷикистон, Орзу Ҳомидов — роҳбари намояндагии созмони ҷамъиятии «Созандагони Ватан» дар вилояти Хатлон, Саидбек Мирзомуддинов — раиси кумитаи ибтидоии ҳизб бо номи «Иттиҳод» дар Федератсияи Россия, Лайло Чоршанбиева — директори Мактаби президентӣ аз ноҳияи Рӯшон, Шаҳло Ватанова — раиси ташкилоти ибтидоии «Шаҳлои Ватан», Афзалшо Карчиев — узви кумитаи марказии ҳизб дар «Неругоҳи Барқи Обии Роғун» ва Авазхон Кабиров — раиси кумитаи иҷроияи ибтидоии «Султони Кабир» сухан гуфтанд.
Пас аз баррасии масъалаи рӯзнома оид ба фаъолияти ҲХДТ дар соли 2016 ва вазифаҳои ташкилотҳои ибтидоии ҳизб дар соли 2017 аъзои Кумитаи иҷроияи марказии Ҳизби Халқии Демократии Тоҷикистон қарори дахлдор қабул карданд.
Руcский