Як қатор биноҳои воқеъ дар кӯчаи Турсунзода (собиқ Красний партизан)-и шаҳри Душанбе, ки дар он муассисаи ислоҳии низомаш шадид, тавқифгоҳи муваққатӣ (СИЗО)-и Вазорати адлия ва тавқифгоҳи КДАМ ҷойгиранд, кӯчонида мешаванд.

Зимни нишасти хабарии ҷмъбасти солона вазири адлияи ҷумҳурӣ Рустам Шоҳмурод изҳор намуд, ки маҳкумшудагони ин зиндонҳо ба муассисаи ислоҳии нав, ки дар роҳ ба самти шаҳри Ваҳдат ба наздикӣ ба истифода дода мешавад, гузаронида мешаванд.

Бино ба гуфтаи ӯ, барои сохтмони навбати аввали муассисаи ислоҳии нав дар роҳ ба самти Ваҳдат наздики 50 млн. сомонӣ маблағ масраф шудааст.

Ғайр аз ин, қайд кард ӯ, ҳукумат сохтмони муасисаи ислоҳии навро дар ноҳияи Рӯдакӣ низ ба нақша гирифтааст.

Рустами Шоҳмурод ҳамчунин зикр кард, ки айни замон дар муассисаҳои ислоҳии Тоҷикистон ҳудуди 12 ҳазор нафар адои ҷазо мекунанд.

Муассисаи ислоҳии мазкур бо он маъруфу маълум аст, ки санаи 23 августи соли 2010 аз он 25 зиндонӣ (5 русиягӣ, 2 шаҳрванди Ӯзбекистон, 4 афғонистонӣ ва 14 шаҳрванди Тоҷикистон) фирор намуда, амалиёти боздошти пурраи онҳо 13 ноябри соли 2011 ба итмом расид.

Дарҳол пас аз фирори маҳбусон таҳти сарварии вазири умури дохилии ҷумҳурӣ ситоди фаврӣ тасъсис ёфта, муддати тамоми сол кормандони мақомоти ҳифзи ҳуқуқ дар пайи ҷустуҷӯйи онҳо мунтазам амалиёт мегузарониданд. Дар ҷараёни амалиёт 24 нафар маҳбусӣ фирорӣ боздошт ё кушта шуданд. Мутаассифона, кормандони мақомоти ҳифзи ҳуқуқ низ аз талафот эмин намонданд.

Дар иттилоияи КДАМ пас аз чанд рӯзи фирори маҳбусон гуфта мешуд, маҳбусон бо истифода аз «бемасъулиятӣ ва хунукназарии кормандони тавқифгоҳ нисбат ба вазифаҳои худ» фирор намудаанд. Баъди чанде раиси КДАМ ва се нафар муовинони ӯ истеъфо доданд.

Собиқ муовини сардори тавқифгоҳ Сайдулло Бердиев ва посбони ин муассиса Сӯҳроб Акбаров бо ҳукми додгоҳ ба муддати 8,5 сол аз озодӣ маҳрум карда шуданд. Як посбони дигари муассиса Саидалӣ Саидов ба муддати 2 сол равонаи зиндон гардид. Барои хунукназарона муносибат кардан ба вазифаи худ навбатдори тавкифгоҳ Қобилҷон Касиров ба муддати 5 соли зиндон маҳкум шуд.

Ҳамчунин додгоҳ чаҳор нафар маҳбусони фирориро ба ҳабси абад ва се нафар дигарро ба муддати 30 соли зиндон маҳкум кард. Ғайр аз ин, нисбат ба чанде аз шаҳрвандони  маҳбусони фирориро паноҳдода ё аз маҳалли будубоши онҳо ба мақомот хабарнадода низ ҳукмҳои додгоҳӣ содир шуд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.