Аз шоми дирӯз мусофирони нақлиёти ҷамъиятии пойтахт ба савор кардани мусофирон зиёдтар аз ҷойҳои нишаст, яъне ростистода даст кашиданд ва инро чунин шарҳ медоданд, ки онҳоро бпул бурданӣ нестанд.

Ин ҳолат баъди дар сомонаи “Азия-Плюс” нашр шудани мавод бо номи “Мусофирони ростистода дар нақлиёти ҷамъиятӣ дар Душанбе аз пардохти роҳкиро озод мешаванд” (В Душанбе стоячие пассажиры освобождаются от платы за проезд в общественном транспорте) сурат гирифт.

Дар шӯхии рӯзи 1 апрели худ мо хабар додем, ки ҳамаи мусофироне, ки дар нақлиёти ҷамъиятии шаҳр, аз ҷумла маршрутка, автобус ва троллейбусҳо ҷойи нишаст надоранду ростистода мераванд, аз пардохти роҳкиро озод карда мешаванд.

Ин шӯхиро бисёре аз сокинони пойтахт ҷиддӣ қабул карданд. Имрӯз худи журналистони “Азия-Плюс” низ ба чунин ҳолатҳо дучор омаданд.

- Имрӯз дар маршруткаи №15 мусфиронро танҳо тибқи шумораи ҷойи нишаст мегирифтанд. Мегуфтанд, ки хоҳ-нохоҳ касоне, ки рост истода мераванд, ҳаққи роҳкироро пардохт намекунанд. Ҳатто занон дар шигифт буданд, ки кӯдаконро савор намекунанд, вале ба ин аҳамият намедоданд, - мегӯяд Меҳрангез Турсунзода.

Бино ба гуфтаи ӯ, як ронанда аз он шикоят кардааст, ки сӯзишвории дизелӣ гарон шуда, акнун онҳо хароҷоти худро бароварда наметавонанд.

- Ман чандон зиёд дар истгоҳ набудам, лекин ба чанде аз маршруткаҳо савор шуда натавонистам: кондукторҳо ба одамон аз дохил ба берун рафтанро иҷоза дода, лекин мусофирони нав намегирифтанд: “Бахшиш, намегирем, мегуфт ӯ, - ҳикоя мекунад Саодат Раҳимӣ. – Дар роҳ бошад, кондуктори мо ҳатто сари зону нишаст, то ки аз берун нанамояд.

Ҳайдар Шодиев изҳор намуд, ки дар хиёбони Сино назди Автовокзал кормандони БДА маршруткаҳоро манъ карда, шумори мусофирони дохили онро месанҷиданд.

- Кайҳост, ки чунин ҳолатро надида будам, - мегӯяд ӯ.

Бояд ҷарима шаванд!

Мувофиқи қоидаҳои мусофиркашонӣ, ки аз ҷониби мақомоти шаҳрдории пойтахт тасдиқ шудааст, ронандагони маршруткаҳо ба гирифтани мусофирон зиёдтар аз шумори ҷойи нишаст (ростистодагон) ҳуқуқ надоранд.

Кормандони БДА-и пойтахт масъалаи марбут ба шумори барзиёдатии мусофирон дар маршруткаҳоро қатъиян назорат мекунанд ва ронандагонеро, ки аз меъёр зиёд мусофир мегиранд, ҷарима карда истодаанд, - гуфт имрӯз ба “Азия-Плюс” муовини раиси шаҳри Душанбе Фирдавси Саидзода, ки ба масоили бахши нақлиёт масъул аст.

Дар ҳамин ҳол, тибқи маълумоти РВКД ВКД Тоҷикистон, ронандагоне, ки дар маршруткаҳо аз меъёр зиёд мусофир мегиранд, метавонанд ба маблағи аз 55 то 110 сомонӣ чарима шаванд.

Маблағи чарима мувофиқи шумори мусофироне, ки дар дохили маршрутка рост истодаанд, муайян карда мешавад.

Агар ронанда муддати як моҳ ба чунин қонуншиканӣ роҳ диҳад, маблағи ҷарима зиёдтар шуда метавонад, лекин дар БДА бобати то ба кадом андоза расидани он маълумот надоданд. “Лекин чунин ронандагонро метавонанд аз ҳуқуқи идора кардани нақлиёти ҷамъиятӣ маҳрум созанд”, - қайд кард манбаъ.

Бино ба маълумоти мақомоти шаҳрдории пойтахт, айни замон дар Душанбе беш аз 2900 воситаҳои нақлиёти ҷамъиятӣ ба мусофиркашонӣ машғуланд, ки наздики 80%-и онҳо хусусӣ мебошанд.

Дар тавозуни корхонаҳои коммуналии шаҳр 560 адад воситаҳои нақлиёте қарор доранд, ки ба мусофирони пойтахт хизматрасонӣ мекунанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.