Ташаббусҳои Тоҷикистон дар бораи таҷлили 5500-солагии Саразм ва 700-солагии шоири номдор Камоли Хуҷандӣ ба Феҳристи рӯзҳои ҷашнии ЮНЕСКО ворид гардид.

Раёсати иттилооти ВКХ Тоҷикистон хабар медиҳад, ки ин ташаббусҳо дар Конфронси кулли ЮНЕСКО рӯзҳои 12-28 ноябри соли равон бо иттифоқи оро пазируфта шуданд.

Гуфта мешавад, маросими бузургдошти 5500-солагии таъсиси шаҳри бостонии Саразм 12 сентябри соли 2020  таҷлил хоҳад шуд.

“Бо Қарори ҳукумати Тоҷикистон аз моҳи сентябри 2001 Ёдгории Саразми шаҳри Панҷакент ҳамчун Маркази ташаккули тамаддуни кишоварзӣ, ҳунармандӣ ва шаҳрсозии тоҷикон – «Мамнӯъгоҳи таърихиву бостоншиносии Саразм» эълон гардида, 31 июли 2010 бо пешниҳоди Тоҷикистон ин ёдгории нодир аз ҷониби ЮНЕСКО ба феҳристи мероси фарҳангии умумибашарӣ ворид гардид”, - омадааст дар хабари ВКХ.

Зикр мешавад, ки раисҷумҳури Тоҷикистон Эмомалӣ Раҳмон борҳо аз Саразм боздид карда, бо дастури ӯ дар солҳои 2003-2008 панҷ ҳафриёти бостоншиносӣ дар мавзеи Саразм болопӯш шуд.

Ёдгории таърихии Саразм тирамоҳи соли 1976 аз ҷониби бостоншинос Абдуллоҷон Исҳоқов кашф гардид. Ин ёдгорӣ дар 15 километрии ғарби шаҳри Панҷакент ва 45 километрии шарқи шаҳри Самарқанд ҷойгир аст. Ба гуфтаи бостоншиносон, шаҳри Саразм аз охири ҳазораи IV-уми пеш аз милод ба яке аз марказҳои ҳунармандии минтақаи Осиёи Марказӣ табдил ёфтааст. Ба ин захираҳои бойи тилло, нуқра, мис, сурб ва руҳ дар кӯҳҳои болооби дарёи Зарафшон мусоидат кардааст.

Саразм ҳамчун яке аз марказҳои тамаддуни ҷаҳонӣ аҳаммияти бузурги илмӣ, таърихӣ ва байналхалқӣ дорад. Ин яке аз ёдгориҳои аввалини мероси ҷаҳонӣ дар Тоҷикистон ба шумор меравад. Шаҳрак яке аз қадимтарин нуқтаҳои аҳолинишин ва далелҳои рушди пешрафти шаҳрсозӣ дар Осиёи Марказӣ мебошад. Соли 2010 ба рӯйхати ёдгориҳои таърихии чаҳонии ЮНЕСКО ворид карда шуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.