Дар робита ба қатъи густардаи интиқоли барқ ҳамаи фурудгоҳҳои Ӯзбекистон кори худро қатъ намуданд, хабар медиҳад дафтари матбуоти Uzbekistan Airports.

“Дар фурудгоҳи Тошканд на ҳама мусофирони хатсайри HY-721 дар масири Тошканд-Нур-Султон фурсат ёфтанд, ки аз сабти ном, ҳамчунин аз назорати гумрукиву шиноснома ва муоинаи амниятӣ гузаранд. Ҳавопаймои хатсайри HY-762 Алмаато - Тошканд ба фурудгоҳи алтернативии Навоӣ раҳсипор шуд. Ҳамчунин, ҳайати ҳавопаймои ширкати «Эйр Астана» бо хатсайри KC-127 дар самти Алмато-Тошканд тасмим гирифт, ки ба фурудгоҳи парвоз баргардад”, - омадааст дар хабари ширкат.

Ҳамчунин интиқоли барқ ба фурудгоҳҳои Намангон, Андиҷон, Фарғона, Тирмиз, Қаршӣ, Урганҷ, Бухоро, Нуқус ва Самарқанд қатъ шудааст. Ҳозир танҳо фурудгоҳи Навоӣ бо барқ таъмин аст. Фурудгоҳҳо пас аз анҷоми таъмири шабакаҳои барқ кори худро барқарор мекунанд, гуфтаанд дар Uzbekistan Airports.

Фурудгоҳи “Манас” дар Бишкек ба таъмини мустақил ё худ автономӣ бо барқ гузаштааст. “Фурудгоҳ комилан бо реҷаи муқаррарӣ фаъолият надоорад. Сабт ба хатсайри чартерии Бишкек - Исломобод муваққатан боздошта шуд”, - гуфтаанд ба нашрияи 24.kg дар хадамоти матбуоти фурудгоҳ.

Дар Алмато фурудгоҳ бо реҷаи муқаррарӣ фаъолият дорад. Дар шаҳр инчунин метро ва вокзали роҳи оҳан ба кори худ идома дода истодаанд, лекин хатҳои трлллейббус бо барқ таъмин нестанд.

Субҳи 25 январ дар аксари минтақаҳои Қазоқистону Қирғизистон ва Ӯзбекистон дар як вақт интиқоли барқ қатъ шуд. Интиқоли барқ, аз ҷумла ба шаҳрҳои бузург - Алмато, Тошканд, Бишкек қатъ гардид. Тибқи маълумоти пешакӣ, қатъи садамавии интиқоли барқ дар натиҷаи зиёд шудани сарборӣ дар хати интиқоли барқи “Шимол-Шарқ-Ҷануби Қазоқистон” ба амал омадааст.

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.