The Athletics Integrity Unit 15 март Дилшод Назаров, гурзандози маъруфи тоҷик ва ягонаи қаҳрамони Олимпиадаи соли 2016 аз Тоҷикистонро барои 2 сол аз ҳаққи иштирок дар  дар мусобиқаҳо маҳрум кард. Бар асоси ин тасмим, ягона қаҳрамони олимпии Тоҷикистон наметавонад дар Бозиҳои олимпии Токио ширкат кунад.

Дар ин бора мо чанде пеш хабар дода, тасмим гирифтем, ки варзишгарони дигари тоҷикро, ки ба истеъмоли допинг гунаҳкор шуда буданд, ба хотир орем.

Боз киҳо барои допинг аз мусобиқаҳо маҳрум шуданд?

Соли 2017 дзюдочӣ Ҳоҷимашраб Раҳмонов ба истеъмоли допинг гунаҳкор дониста шуд. Ӯро аз ҳаққи иштирок дар мусобиқаҳои байнулмилалӣ ба муҳалти 4 сол маҳрум намуда, 16 ҳазор доллар ҷарима карданд. Як сол пеш аз ин Раҳмонов барои дарёфти медали биринҷии Ҷемпионати Осиё оид ба дзюдо бо мукофотпулии 6 ҳазору 250 сомонӣ сарфароз гардида буд.

Соли 2018 дар Бозиҳои тобистонаи Осиё самбочӣ Умед Ҳасанбеков ба истеъмоли допинг гунаҳкор дониста шуд. Тибқи маълумоти Федератсияи байнулмилалии самбо, гуштингири тоҷик маводи станозололи аз ҷониби WADA манъшударо истеъмол мекардааст.

Самбочӣ Умед Ҳасанбеков

Худи варзишгар изҳор мекард, ки доруро барои табоюати ҷароҳати пояш истеъмол мекунад. Лекин огаҳӣ надоштан аз қоидаҳои ниҳоди зиддидопингӣ варзишгарро аз масъулият озод намекунад. Бо қарори FIAS ӯ аз медали нуқраи Бозиҳои тобистонаи Осиё дар Индонезия маҳрум карда шуд.

Моҳи марти соли 2018 дар мусобиқаҳои Фаҷр дар Эрон вазнбардорон Асомуддин Сангов ва Сунатулло Ойев ба истеъмоли маводи метилгексанамин айбдор шуда, ҳар кадоме 5 ҳазор доллар ҷарима ва ба муҳлати 2 сол аз ҳаққи иштирок дар мусобиқаҳо маҳрум шуданд.

Моҳи декабри соли 2015 Иттиҳоди ҷаҳонии гуштин (UWW)  барои истифодаи маводи манъшудаи диметилбутиламин, иштироки узви дастаи мунтахаби Тоҷикистон оид ба гуштини озод Зелимхон Юсуповро дар мусобиқаҳо ба муҳлати 4 сол манъ кард.

Зелимхон Юсупов

Соли 2014 допинг-тести ҳимоятгари мунтахаби футболи Тоҷикистон Хуршед Бекназаров дар Бозиҳои 17-уми Осиё дар Инчхони Кореяи Ҷанубӣ натиҷаи мусбат дода, ӯ ба муҳлати 2 сол аз ҳаққи иштирок дар мусобиқаҳо маҳрум шуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.