Дар шаҳри Душанбе имрӯз, 22-юми ноябр барфи аввал борид.

Сарфи назар аз барфрезӣ ва сардии ҳаво, бонувони кӯчарӯб дар саҳни ҳавлии биноҳо ва хиёбонҳои пойтахт машғули коранд. Ин заҳмати онҳо сазовори сипосу қадрдонист!

Бино ба маълумоти Агентии обуҳавошиносии ҷумҳурӣ, рӯзҳои 21-24 ноябри соли ҷорӣ аз сабаби воридшавии анбуҳи ҳавои сард аз самти Урал ва қисмати аврупоии Русия ноустувории вазъи обуҳаво дар қаламрави Тоҷикистон боқӣ мемонад.

Рўзҳои 22-24 ноябр дар баъзе ҳолатҳо боришот (борон бо гузариш ба барфи тар, дар ноҳияҳои кӯҳӣ барф) ба амал меояд. Рӯзҳои 21-22 ноябр дар ноҳияҳои алоҳидаи НТМ, Вилояти Хатлон ва ноҳияҳои ғарбии ВМКБ эҳтимоли бавуҷудоии боришоти бошиддат пешгӯйӣ мешавад.

Рўзҳои 22-24 ноябр ҳарорати ҳаво паст шуда, дар водиҳо ва доманакўҳҳо то +1+6 гармиро ташкил медиҳад.

Аз сабаби якуякбора паст шудани ҳарорати ҳаво ва боридани барф дар роҳҳои нақлиётгарди кӯҳии ҷумҳурӣ пайдоиши қабати барф дар назар буда, дар ноқилҳои барқӣ часпидани барфи тар аз эҳтимол дур нест. Ин давра дар бештари қаламрави ҷумҳурӣ фаромадани туман дар назар буда, дурии биниш аз 200 то 500 метрро ташкил медиҳад.

Ба сохторҳои дахлдор оид ба нигоҳдории роҳҳои нақлиётгард тавсия дода мешавад, ки тайёрии пешакиро оиди рафъи ин зуҳуроти номатлуби табиӣ роҳандозӣ намоянд.

Ба кишоварзони ҷумҳурӣ тавсия дода мешавад, ки аз сабаби ба амал омадани боришоти шиддатнок ва баъдан пастшавии ҳарорати ҳаво ҷамъоварии зироатҳои кишоварзӣ, мева ва сабзавотро саривақтӣ амалӣ карда, ба ноустуворшавии вазъи обуҳаво чораҳои пешакӣ андешанд. Ҷиҳати амалӣ намудани корҳои нотамоми сохтмонӣ дар секторҳои хусусӣ ва давлатӣ андешидани чораҳои зарурӣ аз манфиат холӣ нест.

Рӯзҳои 24 то 26 ноябри соли ҷорӣ бо сабаби софшавии ҳаво ва қатъ гардидани боришот, туманфароӣ ва пастшавии ҳарорати шабона дар водиҳо то -0-5 сардӣ, дар доманакўҳҳо то -3-8 сардӣ, дар минтақаҳои кӯҳӣ то -7-12 сардӣ ва дар ноҳияҳои баландкӯҳӣ то андозаи -20-25 сардӣ пешгӯйӣ мешавад.

Дар давраи ноустувории вазъи обуҳаво фишори атмосферӣ баланд шуда, таъсири он ба беморони гирифтори фишорбаландӣ, дил, диабети қанд ва астма дар назар аст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.