Имрӯз, 20-уми феврал, соати 14:45 ба вақти маҳаллӣ, дар Тоҷикистон заминларза сабт шуд.
Бино ба иттилоъи Пажӯҳишгоҳи зилзилашиносии кишвар, маркази заминларза дар 288-километрии ҷанубу шарқи Душанбе ва 17-километрии ҷанубу шарқи шаҳри Хоруғ, дар ҳудуди ноҳияи Шуғнони Вилояти Мухтори Кӯҳистони Бадахшон, воқеъ буд.
Дар маркази заминларза қувваи зилзила 3 балл, дар Хоруғ 2 баллро ташкил додааст. Аз Кумитаи ҳолатҳои фавқулода ва мудофиаи граждании Ҷумҳурии Тотористон ба «Азия-Плюс» хабар доданд, ки талафот ва хисорот вуҷуд надорад.
Ёдовар мешавем, ки баъд аз заминларзаи шадид дар Туркия ва Сурия, ки садҳо биноро тахриб карда, ҷони даҳҳо ҳазор нафарро рабуд, Кумитаи меъморӣ ва сохтмони Тоҷикистон тасмим гирифт, тобоварии биноҳои нав дар Душанбе, Хуҷанд ва Бохтарро озмоиш кунад.
Дар ин бора рӯзи 16-уми феврал фармони раиси Кумитаи меъморӣ ва сохтмон дар бораи таъсиси комиссияи вижа ба имзо расид.
Дар фармон, ки дар саҳифаи Кумита дар шабакаҳои иҷтимоӣ нашр шуд, гуфта мешавад, ки санҷиш дар бинову иншоотҳое, ки дар солҳои 2018-2022 мавриди баҳрабардорӣ қарор гирифтаанд ва ҳамчунин лоиҳаҳои сохтмони дар оянда бунёдшаванда анҷом дода мешаванд.
Санҷишҳо 22-уми феврал оғоз мешаванд.
Қаблан гузориш шуда буд, ки аз 8-уми феврали соли 2022 то 8-уми феврали соли 2023 дар Тоҷикистон 2165 заминларза рух додааст, ки 9-тои он шиддати беш аз 5 балро доштааст.
Миёни кишварҳои Осиёи Миёна Қазоқистон аз рӯи шумораи заминларза дар як сол мақоми аввалро соҳиб шудааст: дар ин давра дар онҷо 5 ҳазору 134 заминларза рух додааст (аз он 3-тоаш беш аз 5 бал қувва доштааст), дар ҷои дуюм Ӯзбекистон – 2 ҳазору 320 заминҷунбӣ мебошад (аз он 6-тоаш беҳ аз 5 бал қувва доштааст).
Дар ин муддат дар Қирғизистони ҳамсоя 1881 заминларза (аз он 3-тоаш беш аз 5 бал) ва дар Туркманистон 368 (аз он 1-тоаш беш аз 5 бал) заминларза рух додааст.
Гуфта мешавад, ки дар ин давра дар саросари ҷаҳон 64 ҳазору 63 заминларза ба қайд гирифта шудааст (аз он 1839-то бо қувваи беш аз 5 бал аст).
Руcский