Вазорати корҳои дохилии Тоҷикистон санҷишро нисбати корманди милитсия, ки дар яке аз кӯчаҳои шаҳри Душанбе занеро мавриди лату кӯб қарор дод, идома медиҳад.

Санҷиш аз рӯи далели лату кӯби зан ҷараён дошта, аз рӯи натиҷаҳои он дар бораи ҷалби корманди милитсия ба ҷавобгарии ҷиноятӣ тасмим гирифта мешавад, хабар дод ба “Азия-Плюс” як манбаъ аз ВКД Тоҷикистон.

“Худи ҷабрдида алҳол расман ба мақомоти ҳифзи ҳуқуқ бо дархости ҷалби корманди милитсия ба ҷавобгарии ҷиноятӣ муроҷиат накардааст”, - қайд кард манбаъ.

Дар навори видео, ки санаи 21 март дар шабакаҳои иҷтимоӣ нашр шуда, мавриди хашму ғазаби зиёди корбарон қарор гирифт, дида мешавад, ки дар яке аз кӯчаҳои Душанбе марде бо сарулибоси корманди милитсия дар кадом хусус бо зане баҳс карда, баъдан ӯро лату кӯб мекунад.

Дар навор лату кӯби зан аз ҷониби корманди милитсия намоиш дода мешавад. Вақте ду нафар роҳгузарон ба корманди милтсия эрод гирифта, таваҷҷуҳи ӯро ба дигар сӯ ҷалб мекунанд, зан ба сари ӯ зарба мезанад. Баъдан дар кадр дида мешавад, ки зан дар замин хобида, корманди милится дастони ӯро ба пушт мебандад.

Бино ба маълумоти ВКД ҶТ, ин корманди дар навор сабтшуда корманди бозрасии хадамоти роҳбонӣ-пайраҳадории Воҳиди махсуси ВКД, старшина Сафарбек Маҳмасаидзода мебошад.

Зикр гардида буд, ки Сафарбек Маҳмасаидзода аз қонуншикании аз ҷониби сокини ноҳияи Рӯдакӣ Мадина Шамсоваи 33-сола содиршуда пешгирӣ карданӣ буд.

“Зан қаблан барои содир намудани ҷиноятӣ дуздӣ ба ҷавобгарии ҷиноятӣ ҷалб шуда, зимни ҳодиса дар ҳолати мастӣ қарор дошт ва тартиботи ҷамъиятиро вайрон карда, ба мардуми роҳгузар дарафтода буд”, - хабар дода буд ВКД.

Ба иттилои манбаъ, корманди милитсяи бо ӯ баҳсу мунозира намуда, ҳангоми пеши роҳи ҳуқуқвайронкунии Шамсоваро гирифтан бо номбурда дағалона рафтор намуда, худ ба қонуншиканӣ яъне вайрон намудани талаботҳои фармонҳои ВКД Ҷумҳурии Тоҷикистон роҳ дод.

Гуфта мешавад, бо фармоиши Вазири корҳои дохилии Тоҷикистон старшинаи милитсия Маҳмасаидзода Сафарбек Маҳмасаид аз мақомоти корҳои дохилӣ озод карда шуда, ҳамзамон дар асоси ин фармоиш роҳбарияти Воҳиди махсуси ВКД Ҷумҳурии Тоҷикистон барои дуруст ба роҳ нагузоштани корҳои интизоми-тарбиявӣ дар байни ҳайати шахсӣ ба ҷазоҳои гуногуни интизомӣ кашида шуданд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.