Додгоҳи ҳарбии ҳавзаи дуюми ғарбии Маскав ҳомии ҳуқуқ Баҳром Ҳамроевро дар “даъватҳои оммавӣ ба терроризм дар интернет” ва “ташкили фаъолияти созмони террористӣ” гунаҳкор дониста, ба 14 соли зиндон маҳкум кард, менависад Озодлик.
Ба иттилои маркази ҳомии ҳуқуқи “Мемориал”, бо ҳукми додгоҳ 3 соли аввалро Ҳамроев дар зиндон ва муҳлати боқимондаи ҷазоро дар муассисаи ислоҳии низомаш сахт адо мекунад.
Рӯзноманигорони Маскав хабар медиҳанд, ки Баҳром Ҳамроев ба мурофиаи додгоҳӣ бо шиори “«Политический пожар – опасный» (Сӯхтори сиёсӣ хатарнок аст) ҳозир шудааст.
“Теъдоди маҳбусони сиёсӣ кофист. Мусулмонон фаҳмиданд, ки бо кӣ сарукор доранд. Мусулмонон мефаҳманд, ки Русия душманӣ дорад ва далелҳои зиёде дар ин бора ҳаст. Ман аз он одамоне, ки дар Ӯзбекистон ба диктатура дучор шуда буданд, ҳимоя мекардам. Ҳуқуқи инсон (дар Русия) аз Чин дида бадтар аст. Мусулмононе, ки намехоҳанд дар Украина ҷанг кунанд, саркӯб хоҳанд шуд. Мақомот ишора мекунад, ки онҳо душмани дохилианд”, - истинод овардааст ба гуфтаҳои Ҳамроев нашрияи “Сота”.
Қаблан ВАО хабар дода буданд, ки додситон барои Баҳром Ҳамроев 21 соли зиндон дархост намудааст.
Баҳром Ҳамроев натанҳо роҳбари фонди кумаки ҳуқуқӣ ва иҷтимоии муҳоҷирон “Ёрдам”, балки узви маркази ҳомии ҳуқуқи “Мемориал” низ мебошад.
Ҳомии ҳуқуқро охири моҳи феврали соли гузашта барои навиштаҳояш дар Facebook боздошт намуданд. Ҳамон вақт дар манзили Ҳамроев, ки бо иттиҳоми “сафедсозии терроризм” (моддаи 205.2-и Кодекси ҷиноии Русия) муттаҳам мешуд, кофтуков гузаронида шуда, сипас ӯ ба боздоштгоҳи муваққатӣ (СИЗО)-и Лефортово фиристода шуд.
Хадамоти федералии амният дар навиштаҳои Ҳамроев унсурҳои пуштибонӣ аз созмони фаъолияташ дар Русия манъшудаи “Ҳизб-ут-таҳрир” пайдо кардааст.
Моҳи октябри соли гузашта нисбат ба ин ҳомии ҳуқуқ бо ҷурми "ташкили фаъолияти террористӣ" (моддаи 205.5-и Кодекси ҷиноии Русия) боз як парвандаи ҷиноӣ боз шуда буд.
Ҳамкорони Баҳром Ҳамроев иддао доранд, ки ҳомии ҳуқуқ бо сабаби фаъолияти касбиаш мавриди таъқиб қарор гирифтааст.
Баҳром Ҳамроев, зодаи Бухоро ва узви ҳаракати мухолифи "Бирлик" дар соли 1992 бо сабаби таъқиби сиёсӣ маҷбур шуд, ки Ӯзбекистонро тарк кунад.
Тайи 25 соли ахир Ҳамроев ба ҳифзи ҳуқуқи муҳоҷирон, гурезаҳо ва мусулмонон машғул буд. Қаблан Хадамоти федералии амният ва ВКД Русия борҳо алайҳи ӯ парвандаҳои ҷиноӣ ва маъмурӣ боз карда буданд.
Баҳром Ҳамроев, аз мунтақидони сарсахти режими собиқ сарвари давлати Ӯзбекистон, марҳум Ислом Каримов, борҳо дар назди муҷассамаи аввалин президенти Ӯзбекистон дар Маскав тазоҳурот баргузор кардааст.
Руcский