Президенти Тоҷикистон Эмомалӣ Раҳмон шоми 11-уми сентябр дар чорабинии идона ба ифтихори 28-умин солгарди Истиқлолияти давлатии Тоҷикистон дар амфитеатри шаҳри Кӯлоб иштирок ва суханронӣ кард.

Дар намоиши театришуда дар амфитеатри шаҳр ба ин муносибат қариб 6 ҳазор нафар иштирок карданд.

Бино ба иттилои хадамоти матбуоти сарвари давлат, Эмомалӣ Раҳмон сокинон ва меҳмонони шаҳрро бо ҷашн табрику таҳният гуфта, дастовардҳои онҳоро дар кори ободонии Кӯлоб қайд кард.

Таъкид шуд, ки айни ҳол бо дастгирии ҳукумати ҷумҳурӣ дар шаҳру деҳоти Кӯлоб татбиқи 15 лоиҳаи сармоягузорӣ дар соҳаҳои маориф, тандурустӣ, коммуналӣ ва кишоварзӣ идома ва то имрӯз корҳо ба маблағи қариб 120 млн. сомонӣ иҷро шудаанд.

Зикр гардид, ки тибқи нақшаи корҳои ободонӣ ба истиқболи 30-солагии истиқлоли давлатии ҷумҳурӣ дар шаҳри Кӯлоб бунёд ва таъмиру азнавсозии қариб ҳазор иншоот пешбинӣ гардида, соли 2019 бунёду азнавсозии 271 иншоот ба нақша гирифта шудааст ва аз ин шумора дар 6 моҳи соли равон корҳо дар 65 иншоот ба анҷом расидаанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.