Лоиҳаи Kitobz.tj тасмим гирифт, ки дар шаҳри Душанбе “китобхонаҳои кӯчагӣ”-и бепул ташкил кунад. Ҳадаф аз ин иқдом ҷалби мардум ба китобхонӣ аст.
Ин тарзи ҷалби мардум ба китобхонӣ дар бисёре аз кишварҳои ҷаҳон роиҷ аст. Хоҳишмандон аз онҳо китоби маъқулшудаашонро бепул гирифтаву хонда ва боз ба ҷояш баргардонида метавонанд. Ё дар навбати худ метавонанд ба ин “китобхона" китоби худро оранд.
Дар шаҳрҳои гуногуни Фаронса, Олмон, ИМА, Русия, Колумбия, Украина ва чанде аз дигар кишварҳо даҳҳо чунин китобхонаҳо амал мекунанд.
Ба ин монанд “Китобхонаҳои бепул” ё худ кӯчагӣ дар Тоҷикистон низ мавҷуданд.
Охири соли 2017 дар боғи марказии Хоруғ 2 ҷевони китоб гузошта шуд. Ҷевонҳо бо ташаббуси роҳбари Ташкилоти ҷамъиятии “Умедвор” Зоҳир Шоҳмусалламов гузошта шуда, он аз ҷониби ширкати “Помир Энержи” дастгирӣ ёфт. Даҳто чунин ҷевонҳо тайёр карда шуданд.
Роҳбари лоиҳаи Kitobz.tj Баҳром Саъдиев мегӯяд, захираи “китобхонаҳои кӯчагӣ”-ро дилхоҳ шахс зиёд карда метавонад. Ҳар моҳ санҷиш гузаронида шуда, китобе, ки намерасад, илова ва зиёдатиаш гирифта мешавад.
“Аз оғози татбиқи лоиҳаи Kitobz.tj 1 март 4 сол пур мешавад ва тӯли ин муддат мо зиёда аз 35 ҳазор нусха китоб дастрас намудем, - изҳор дошт ӯ. - Соли 2021 дар Душанбе 10-то чунин “китобхонаи кӯчагӣ” гузоштанием ва огаҳем, ки дар кадом мавзеи пойтахт зиёдтар китобхонҳо ҳастанд. Ин маркази шаҳр, маҳаллаҳои 82-юм, Зарафшон, Садбарг, қаламрави наздикии фурудгоҳ, маҳаллаи 46-ум, Гипрозем ва Профсоюз (Филармонияи давлатӣ) мебошанд”.
Зимнан зикр шуд, ки айни замон ташаббускорони ин иқдом розигии шаҳрдории пойтахтро ба гузоштани китобхонаҳо интизоранд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский