Роҳҳои Душанбе-Хуҷанд ва Душанбе-Хоруғ аз тармаҳо тоза шуда, ҳаракат тариқи онҳо барқарор шуд. Лекин на барои ҳама навъи воситаҳои нақлиёт, хабар доданд ба “Азия-Плюс” аз Кумитаи ҳолатҳои фавқулодаи ҷумҳурӣ.

“Роҳи Душанбе – Хуҷанд барои ҳаракати мошинҳои сабукрав боз шуд. Роҳи Душанбе – Хоруғ низ тоза шуда, ҳаракат иҷоза шуд. Лекин ҳоло ҳам хатари зиёди тармафароӣ боқӣ мемонад”, - гуфт сухангӯи Кумита Умеда Юсуфӣ.

Дар ширкати IRS, ки масъули роҳи Душанбе – Чаноқ аст, хабар доданд, ки роҳ дар умум муддати 8-9 соат баста шуд.

“Роҳ аз тарма тоза ва бо регантҳо коркард шуда, айни замон аз ҳар ду самт ба ҳаракати воситаҳои нақлиёт иҷоза шуд. Барои маҳдуд нашудани ҳаракат ва ба вуҷуд наомадани ҳолатҳои танбашавӣ ҳаракати мошинҳои ядакдор (притсепдор) ва бузургҳаҷм (фураҳо) муваққатан манъ аст”, - хабар дод сухангӯи IRS Далер Мерганов.

Ба гуфтаи ӯ, дар қитъаҳои ҷудогонаи роҳ барфрезӣ идома дошта, эҳтимоли тармафароиҳои нав боқӣ мемонад. “Дар қитъаҳо техникаи махсус машғули кор буда, раҳбарияти ширкат аз дирӯз дар маҳалли ҳодисаҳо қарор дорад”, - гуфт ӯ.

Зимнан зикр шуд, ки барои тозакунии роҳ аз тармаву барфтӯдаҳо 210 адад техника ва механизмҳо сафарбар шуда, 300 тонна сӯзишворӣ ва зиёда аз 20 тонна реагентҳо захира шудааст, ки ба қитъаҳо тақсим шудаанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.