Сафорати Тоҷикистон дар Қирғизистон изҳор медорад, ки аз ин масъала огоҳ аст ва ҷиҳати ҳалли мушкили зани бандмонда дар Ӯш тадбирҳо меандешад.

“Оид ба ҳалли масъалаи мазкур бо мақомоти дахлдори Қирғизистон дар тамос буда, дар ин самт корҳо ҷараён доранд ва умедворем, ки дар фурсати наздик онро ҳал мекунем”, - илова кардаанд дар сафорат.

Қаблан Радиои Озодӣ хабар дод, ки Маргарита Расулова, шаҳрванди Тоҷикистон бо набераи 6-солааш дар фурудгоҳи шаҳри Ӯши Қирғизистон дармондааст. Гуфта мешавад ӯ рӯзи сеюм аст, ки дар ин фурудгоҳ банд мондааст.

Ин зан, ки бо наберааш рӯзи 25-уми май аз Сургути Русия ба Қирғизистон парвоз кардааст, бояд баъдан мебоист аз он ҷо бо роҳи заминӣ ба Тоҷикистон меомад, вале марзбонони қирғиз ба ӯ иҷозаи аз фурудгоҳ берун шуданро надодаанд.

"Ба мо гуфтанд, ки ба ҳама иҷозат ҳаст, билет фурӯхтанд, санади бозгашт ба ватан доданд, ки амалан мо дигар ҳеҷ ҳуҷҷате надорем. Дар хазинаи чиптахарӣ пурсидем, ки чӣ хел ба Тоҷикистон равем, гуфтанд, ба воситаи Уш. Мо 25-уми май омадем ва дар хати сурх дармондем. Ба мо ҳатто об намедиҳанд. Мо хоҳиш кардем, ки иҷоза диҳанд, нон харем, вале иҷоза надоданд. Боварам намеояд, ки як зану кӯдакро иҷозаи сафар ба ватанашон надиҳанд. Се рӯз боз азоб мекашем.",--гуфтааст Маргарита Расулова.

Алия Қурбонова, сухангӯи фурудгоҳи "Манас" банд мондани як зану кӯдак аз Тоҷикистон дар фурудгоҳи Ӯшро тасдиқ карда, вале гуфтааст, онҳо аз ҷониби ширкате, ки онҳоро овардааст, бо маводи ғизоӣ таъмин мешаванд.

Сарҳад баста аст

Рӯзи 25-уми май раиси Девони вазирони Қирғизистон, Улуғбек Марипов дар мулоқот бо сокинони деҳаи марзии Чон Алайи вилояти Ӯш дар бораи комилан қатъ шудани равуои марзӣ миёни Қирғизистону Тоҷикистон то ҳалли комилаи масъалаҳои сарҳадӣ, хабар дода буд.

Тибқи қарори Девони Вазирони Ҷумҳурии Қирғизистон аз 21 май равуои марзӣ барои Тоҷикистон тавассути қаламрави  Қирғизистон маҳдудиятҳои муваққатӣ ҷорӣ шудааст.

Хабаргузории қирғизии АКИпресс бо такя ба Хадамоти марзбонии Кумитаи давлатии амнияти миллии Қирғизистон хабар дода буд, ки убуру мурури  воситаҳои нақлиёт ба Тоҷикистон аз  гузаргоҳҳои "Кулунду”, "Қайрағач”, "Қизил-Бел”, "Бордебо” ва "Қарамиқ", ки дар қисмати марзи Қирғизистон бо Тоҷикистон ҷойгир аст, маҳдуд шудааст.

Ин маҳдудият ба намояндагиҳои дипломатии Қирғизистону Тоҷикистон ва аъзои хонаводаи онҳо, кормандони намояндагиҳои дипломатии давлатҳои хориҷӣ, ташкилоти байналмилалӣ ва аъзои хонаводаашон, ҳамчунин ба шахсони мансабдори Қирғизистону Тоҷикистон, ки пешакӣ бо таъйиди мақомоти салоҳиятдори Ҷумҳурии Қирғизистон сафар мекунанд.

Ҳамзамон дар ин қарор гуфта шудааст, ки шаҳрвандони Қирғизистону Тоҷикистон ҳастанд метавонанд ба ҳудуди кишвари якдигар баргарданд.

Вазорати корҳои хориҷии Тоҷикистон дар робита ба тасмими ҷониби Қирғизистон дар мавриди комилан қатъ кардани равуои марзӣ, аз шаҳрвандони кишвар хост, ки аз ҳама намуди сафар ба ин кишвар ва ё убури тронзитӣ ба кишварҳои дигар тавассути қаламрави ин кишвар, даст кашанд.

"Аз шахсони ҳуқуқӣ ва соҳибкорони инфиродии Ҷумҳурии Тоҷикистон, ки ба ҳамлу нақли мусофирон ва бор тавассути ҳамаи навъҳои нақлиёт машғуланд, изҳори хоҳиш мегардад, ки аз қаламрави Ҷумҳурии Қирғизистон истифода накунанд ва масирҳои дигарро тавассути кишварҳои сеюм ба кор баранд",-омадааст дар ҳушдори ин вазорат.

 Бояд гуфт, ки бар асоси қарори Девони вазирони Қирғизистон аз 21-уми май ин кишвар то поёни ҳалли ҳама гуна баҳсҳои марзӣ рафуои марзиро бо Тоҷикистон комилан қатъ кард. Вазорати корҳои хориҷии Тоҷикистон мегӯяд, ки ин " қарори Девони  Вазирони Ҷумҳурии Қирғизистон №12-р аз 21 майи соли 2021, бидуни огоҳии пешакӣ қабул шуд".

Вазорат ба шаҳрвандон гуфтааст, ки дар сурати поймол шудани ҳуқуқ ё зоҳир гардидани муносибати ғаразнок нисбат ба шаҳрвандони мо дар қаламрави Ҷумҳурии Қирғизистон, шаҳрвандони мо метавонанд ба Сафорати Ҷумҳурии Тоҷикистон дар Бишкек аз рӯи хатти алоқаи доимии рақамҳои +996500442211 ва +996312511637 муроҷиат кунанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.