Раиси Кумитаи ҳолатҳои фавқулода ва мудофиаи гражданӣ (КҲФ ва МГ)-и назди ҳукумати Тоҷикистон Рустам Назарзода зимни мулоқот бо роҳбари Раёсати умури паноҳандагони СММ дар Осиёи Марказӣ Ханс Фридрих Шоддер дар баробари дигар масоили муҳим, доир ба гурезаҳо низ ибрози назар кард.

Дар ин бора маркази матбуоти Кумита хабар медиҳад. Гуфта мешавад, дар вохӯрӣ ба вазъияти кунунӣ дар марзи давлатии Тоҷикистону Афғонистон таваҷҷуҳ зоҳир шудааст.

“Дар ин робита масоили роҳандозии тадбирҳои зарурӣ дар сурати вуруди миқдори зиёди гурезаҳо мавриди баррасӣ қарор гирифтанд”, - зикр мешавад дар хабар, лекин мушаххасан доир ба тадбирҳо чизе гуфта нашудааст.

Ба иттилои манбаъ, дар ҷараёни вохӯрӣ инчунин атрофи масъалаҳои тақвияти ҳамкориҳо ва татбиқи минбаъдаи лоиҳаҳои муштарак, вокуниш ба офатҳо, ҳамкориҳои мутақобила дар самти иттилоърасонӣ ва огаҳкунии аҳолӣ дар бораи таҳдиду хатарҳо, инчунин омода кардани мутахассисони имдодгар ва расонидани кумаки техникӣ табодули назар сурат гирифтааст.

Ёдрас мекунем, ки чанде қабл Раёсати Комиссари олии СММ оид ба умури гурезаҳо аз ихроҷи шаҳрвандони Афғонистон, ки хостори паноҳгоҳ дар Тоҷикистон мебошанд, изҳори нигаронӣ кард.

Раёсат аз мақомоти Тоҷикистон даъват намудааст, ки аз баргардонидани ҳама гуна хоҳишмандони паноҳгоҳ ба Афғонистон худдорӣ намуда, фавран анҷоми расмиёти будубоши қонунӣ ва муайян кардани мақоми паноҳандагонро барқарор кунанд.

Аввали моҳи сентябри соли ҷорӣ вазири корҳои дохилии Тоҷикистон Рамазон Раҳимзода зимни вохӯрӣ бо роҳбари Намояндагии Комиссари Олии СММ оид ба гурезаҳо (UNHCR) Мулугета Зевди изҳор намуда буд, ки танҳо дар 15 соли охир Тоҷикистон зиёда аз 15 ҳазор гурезаҳои афғонро қабул кардааст.

Он замон вазир таъкид дошта буд, ки давоми 20 сол ба Тоҷикистон ҷиҳати бунёди инфрасохтор барои қабули гурезаҳо ва шахсони паноҳҷӯянда аз ҷониби ягон созмону ташкилотҳои байналмилалӣ кумаки амалӣ эҳсос карда нашудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.