Дар шаш шаҳри Русия рӯзҳои 4-11 июл намоишҳои махсуси драмаи Михаил Бородин «Продукты 24» баргузор мешавад. Сюжети филм ба қазияи пурсарусадои “ғуломони голяновӣ” дар соли 2012 асос ёфтааст, ки дар он муҳоҷирон дар ноҳияи Голяновои Маскав дар шароити ғайриинсонӣ нигаҳдорӣ шуда, моликони мағозаҳои маҳсулоти хӯрокворӣ онҳоро маҷбуран кор мефармуданд.
Филм дар шаҳрҳои Маскав, Санкт-Петербург, Екатеринбург, Новосибирск, Самара ва Хабаровск намоиш дода мешавад, менависад хабаргузории Фергана.
Нахустнамоиши драмаи «Продукты 24» соли 2022 дар Ҷашнвораи кинои Берлин дар барномаи Panorama доир гардид. Филм ба ҷоизаи Конфедератсияи кинои ҳунарии Аврупо сазовор дониста шуд.
Қазияи “Голяново” баъди аз ҷониби фаъолони ҷомеаи шаҳрвандӣ озод кардани 12 нафар, аз ҷумла 9 нафар занон 30 октябри соли 2012 маъруфият пайдо кард. Ба гуфтаи озодшудагон, моликони мағоза - шаҳрвандони Қазоқистон онҳоро маҷбур мекарданд, ки бепул кор кунанд, дар шароити бад нигоҳ дошта, лату кӯб ва ба номуси занон дастдарозӣ мекарданд.
Чанде аз занон дар ин давра фарзанд таваллуд карда, зани соҳиби мағоза онҳоро мегирад ва мегӯяд, ки ба хешовандонаш дар Қазоқистон медиҳад ва сипас хабар медиҳад, ки кӯдакон фавтидаанд.
Ба гуфтаи занон, чанде аз онҳо беш аз 10 сол дар ин мағоза қарор дошта, дар ин давра боре ҳам ба кӯча набаромадаанд.
Фаъолони ҷомеаи шаҳрвандӣ аз ин қазия баъди муроҷиати ду зани зодаи Ӯзбекистон ва Қазоқистон, ки чандин сол аз духтарони ба муҳоҷират рафтаи худ, хабаре намегирифтанд, огаҳӣ пайдо карданд. Онҳо исрор меварзиданд, ки духтаронашон дар ғуломӣ қарор доранд.
Тибқи иттилои кумитаи «Гражданское содействие» (дар Русия ТҒД - агенти хориҷӣ эътироф шудааст), 4 ноябр дар бораи ғайриқонунӣ аз озодӣ маҳрум намудани одамон парвандаи ҷиноятӣ боз шуда, лекин баъди ду рӯз прокуратура қарори муфаттишро бекор кард ва маводро ба тафтишоти дубора фиристод.
Дар идома мақомоти пулис ва муфаттишон чандин бор ба кормандони ҷабрдидаи мағозаҳо оғози парвандаи ҷиноятиро рад карда, додгоҳи ноҳияи Преображенский, ки аз болои қарорҳо ба он шикоят бурда шуда буд, мақомоти қудратиро дастгирӣ намуд.
Моҳи ноябри соли 2016 кормандони маркази ҳомии ҳуқуқи “Мемориал” (ба феҳисти агентиҳои хориҷӣ дохил шуда, моҳи декабри соли 2021 бо қарори суд барҳам дода шуд) дар ҳамдастӣ бо коршиноси “Гражданское содействие” дар мавриди парвандаи “ғуломони голяновӣ” ба Додгоҳи ҳуқуқи башари Аврупо шикоя бурданд. Моҳи ноябри соли 2021 ин додгоҳ парвандаро ҷиҳати баррасӣ қабул кард.
Руcский