Дар Қирғизистон 3 ҳолати гирифторӣ ба коронавирус ошкор шудааст. Тавре kabar.kg иттилоъ медиҳад, дар ин бора зимни брифинги 18-уми март вазири тандурустии ин кишвар Космосбек Чолпонбоев хабар додааст.

Вазир қайд кардааст, ки коронавирус шаби аз 17 ба 18-уми март дар 3 шаҳрванд ошкор шудааст, ки ҳанӯз рӯзи 12-уми март аз Арабистони Саудӣ баргаштаанд.

“Онҳо дар хонаҳояшон зери назорати табибон буданд. Рӯзи 16-уми март ҳарорати бадани яке аз онҳо баланд шуда, ташхис сироятёбии ӯ ва боз ду нафари дигарро тасдиқ кардааст. Айни замон ҳамаи онҳо зери назорат қарор доранд”, - гуфт вазир.

Чанде пеш Қирғизистон изҳор дошт, ки сарҳадҳояшро баста, вуруди хориҷиёнро манъ мекунад.

Тибқи маълумоти Донишгоҳи Ҷон Ҳопкинс, то субҳи имрӯз дар саросари дунё 198 ҳазор ҳолати сирояти коронавирус ба қайд гирифта шудааст. Аз ин шумор қариб 82 ҳазор нафар муолиҷа ва шифо ёфтаанд.

Дар кишварҳои ҳамсоя бо Тоҷикистон ҳолатҳои сирояти коронавирус тариқи зайл аст:

дар Ӯзбекистон – 11 ҳолат,

дар Қирғизистон – 3 ҳолат,

дар Афғонистон – 21 ҳолат.

Дар Қазоқистон – 35 ҳолат ва дар Русия то субҳи 18-уми март – 114 ҳолати сирояти коронавирус ба қайд гирифта шудааст.

Тоҷикистон аз коронавирус озод боқӣ мемонад. Бино ба маълумоти вазрати тандурустӣ ва ҳифзи иҷтимоии аҳолии ҶТ, дар кишвар ягон ҳолати сирояти коронавирус сабт нашудааст. Аммо дар вазорат аз шумори шахсоне, ки айни замон ба карантин гирифта шудаанд, хабар намедиҳанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.