Душанбе. 9-уми август. ОИ «Азия-Плюс» - Президенти   Ҷумҳурии   Тоҷикистон Эмомалӣ Раҳмон субҳи   рӯзи   8   август    дар   доираи   барномаи   сафар   ба   Ҷумҳурии Мардумии Чин   аз   Маркази   миллии   санъат   боздид   ба   амал   овард. Ин    марказ    яке аз   калонтарин   маҷмааҳои   фарҳангии   шаҳри Пекин   ва   дар   маҷмӯъ   Ҷумҳурии мардумии Чин    маҳсуб   ёфта,   бо толорҳои   консертии   дорои   акустикаи   махсус   ва   таҷҳизоти   муосири   визуалӣ мебошад.

Бегоҳии   рӯзи   8 – уми   август   расо   соати 20-00   бо вақти   Пекин   Эмомалӣ Раҳмон   ҷиҳати   иштирок   дар   маросими   расмии   ифтитоҳи   Бозиҳои 29 – уми   тобистонаи олимпӣ   ба варзишгоҳи   марказии давлатии «Лонаи парранда»   омад.

Эмомалӣ Раҳмон ва дигар   роҳбарони   олимақоми   кишварҳои   хориҷиро   Раиси   Ҷумҳурии Мардумии   Чин   Ху   Тсзин Тао   истиқбол    гирифт.

Қадамзании устувору боэътимоди варзишгарони тоҷик, ки бо Парчами давлатии Тоҷикистон дар қатори садҳо нафар варзишгарони беҳтарини ҷаҳон дар гирди майдони бузурги варзишгоҳи «Лонаи парранда»   чарх мезаданд, боиси ифтихор ва умедҳои зиёд аз натиҷаҳои ҳунарнамоии онҳо дар Бозиҳои Олимпӣ аст.

Хотиррасон мекунем, ки Тоҷикистонро дар Бозиҳои 29-уми Олимпии Пекин 15 нафар беҳтарин варзишгарони тоҷик дар риштаҳои бокс, гӯштини дзюдо, гӯштини тарзи озод, камонварӣ, шиноварӣ, вазнбардорӣ ва варзиши сабук намояндагӣ мекунанд.

Маросими   ифтитоҳи   бозиҳои   олимпӣ   хеле   пуршукӯҳ ҷараён   гирифта,   аз оғози   боз   як   тантанаи   муҳими   ҷаҳонии   варзишӣ   дарак   дод. Дар ин бора аз дафтари матбуоти сарвари давлат хабар доданд.