Душанбе. 14-уми октябр - Варзишгарони тоҷик дар мусобиқоти қаҳрамонии ҷаҳон оид ба гӯштии самбо байни наврасону ҷавонон дар шаҳри Тошканд 5 медал - 1 тилло, 1 нуқра ва 3 биринҷӣ ба даст оварданд.

Дабири кулли Федератсияи гӯштии самбои Тоҷикистон Маҳмуди Абдуллоҳ изҳор доштааст, ки дар ин мусобиқот беш аз 500 варзишгар аз 35 кишвар ширкат карданд.

Паҳлавони навраси тоҷик Акмолиддин Каримов дар вазни то 48 кг ба унвони қаҳрамонӣ ва медали тилло даст ёфт. Айниддин Қурбонов дар ин вазн байни ҷавонон ҷои дувумро касб карда, бо медали нуқра мукофотонида шуд.

Файзиддин Абдуллоев дар вазни то 70 кг байни наврасон соҳиби медали биринҷӣ гардид. Инчунин Сулаймон Сулаймонов дар вазни то 74 кг байни ҷавонон ва Рашид Раҳимов дар вазни то 75 кг миёни наврасон медали биринҷӣ гирифтанд.

Дар ҳисоби дастаӣ Русия бо касби 28 медал, аз ҷумла 16 тилло ғолиб шуд. Дастаҳои мунтахаби Қазоқистон ҷои дуввум ва Беларус ҷои севумро касб карданд. Тоҷикистон дар ҷои 6-ум қарор гирифт.