Ҷаҳонпаҳлавони тоҷик Расул Боқиев феълан барои иштирок дар мусобиқаи байнулмилалии дзюдо дар Фаронса омодагӣ мебинад ва дар сурати ғолибият, дар Бозиҳои олимпии тобистонаи соли 2016 ширкат хоҳад кард.

Расул Боқиев дар суҳбат ба Хабаргузории “Азия-Плюс” гуфт, ки агар дар мусобиқаи Фаронса пирӯзиро ба даст наорад, аз риштаи варзиш канор меравад.

Вай афзуд, ки феълан бо сафари 8-рӯза дар Тоҷикистон қарор дорад ва имрӯз бо даъвати бародарбузургаш Алишер Боқиев дар толори варзишии “Авитсена”-и ноҳияи Ҳисор ҳамчун мураббӣ барои ҷавонону наврасон як мастер-класс гузаронид. Дар он беш аз 70 нафар варзишгарони синнашон аз 4 то 35-сола иштирок карданд. Қаҳрамони ҷумҳурӣ дар риштаи дзюдо ва гуштини миллӣ Амонулло Азимов дар ин чорабинии омӯзишии варзишӣ ба ҳайси ёвари Расул Боқиев фаъолият дошт.

Алишер Боқиев дар робита ба вазъи кунунии бародараш гуфт, ки Расулро ба ғайр аз Кумитаи ҷавонон, варзиш ва сайёҳии Тоҷикистон ягон сарпарасти дигар дастгирӣ накард. “Аз ҳамин сабаб бародарам ҳоло дар Русия аз ҳисоби худ барои Бозиҳои олимпии тобистонаи соли 2016 тайёрӣ дида истодааст”, - афзуд Алишер.

Марбут ба ин масъала худи Расул Боқиев чунин изҳор дошт: “Агар ягон сарпараст ба Тоҷикистон даъват кунад, ман ба Ватан бармегардам”.

Ӯ тасмим дорад, то сафари навбатияш ба Русия, дар чорабинии варзишии ноҳияи Рӯдакӣ миёни ҷавонону наврасон ва маросими ифтитоҳи толори варзишӣ дар маҳаллаи 103-и шаҳри Душанбе ширкат варзад.