Футболбози дастаи мунтахаби Тоҷикистон Хуршед Бекназаров пас аз вохӯрӣ бо дастаи мунтахаби Сингапур дар Бозиҳои Осиё дар Инчхони Кореяи ҷанубӣ, ки бо ҳисоби 1 бар 0 ба фоидаи тоҷикистониён анҷом ёфта буд, аз ташхиси допинг нагузашта, Инчхонро тарк кард.

Дар Кумитаи миллии олимпии ҷумҳурӣ ба «Азия-Плюс» ин хабарро тасдиқ намуда, зикр карданд, ки ошкор гардидани маводи манъшуда дар бадани футболбоз ба бознигарии натиҷаи вохӯрӣ бо Сингапур боис нахоҳад шуд.

Ба иттилои манбаъ, бозингари дигари дастаи мунтахаби Тоҷикистон Абдулло Саидов ба иллати дарди кӯрруда дар Инчхон ҷарроҳӣ шуда, дигар имкон надорад, ки дар ҳайати дастаи мунтахаб бозӣ кунад.

Ёдрас мекунем, ки дастаи мунтахаби олимпии Тоҷикистон дар мусобиқоти гурӯҳии Бозиҳои XVII-уми осиёӣ дар Инчхони Кореяи Ҷанубӣ бар дастаҳои мунтахаби Сингапур ва Уммон бо ҳисоби якхелаи 1 бар 0 ғолиб омада, ба даври 1/8 финалӣ роҳ ёфт.