Аз 15 то 25-уми октябр дар шаҳри Душанбе тибқи барномаи ҳамраъйии олимпӣ давраҳои омӯзишии байнулмилалӣ барои мураббиёни футбол доир мегардад.

Бино ба иттилои Федератсияи футболи Тоҷикистон, машғулиятҳоро дар ин давраи омӯзишӣ қаблан футболбози машҳури замони шӯравӣ, футболбози беҳтарин дар таърихи футболи Белорус, дорандаи медалҳои нуқраи мусобиқоти қаҳрамонии Аврупо (соли 1988) дар ҳайати дастаи мунтахаби Иттиҳоди Шӯравӣ, собиқ нимҳимоятгари дастаҳои «Динамо»-и Минск ва «Ювентус»-и Италия Сергей Алейников баргузор мекунад.

Гуфта мешавад, Сергей Алейников дар як қатор дастаҳои фтуболи Италия ба ҳайси мураббӣ низ фаъолият кардааст.

Қобили зикр аст, ки Сергей Алейников дар дастаҳои «Динамо» Минск (солҳои 1981 - 1989), «Ювентус» Турин, Италия (1989 - 1990), «Лечче», Италия (1990 - 1993), «Гамба Осака», Япония (1993 - 1995), «Оддеволде», Шветсия (1996), «Корильяно», Италия (1997) ҳунарнамоӣ кардааст.

Дар мусобиқоти Чемпионатҳои Аврупо (солҳои 1988 ва 1992), Чемпионати ҷаҳон (солҳои 1986 ва 1990) низ ширкат варзида, аз рӯи назарсанҷӣ ба муносибати 50-солагии Иттиҳоди ассотсиатсияҳои футболи Аврупо (УЭФА) беҳтарин футболбози Белорус дар тӯли 50 сол эътироф гардидааст.