Дар мусобиқаи байнулмилалии футболи «Ҷоми Иттиҳод-2015», ки дар шаҳри Санкт-Петербурги Русия доир гардид, дастаи мунтахаби футболи ҷавонони Тоҷикистон (U-21) дар бозӣ барои ишғоли ҷойҳои 7-8-ум аз дастаи Қазоқистон бо ҳисоби 0 бар 2 шикаст хӯрда, зинаи 8-умро ишғол кард.

Қобили зикр аст, ки дар бозии даври гурӯҳии ин мусобиқа низ дастаҳои Тоҷикистону Қазоқистон бо ҳам вохӯрда, дар он бозӣ футболбозони тоҷик бо ҳисоби 1 бар 0 дастболо гардида буданд.

Ду сол қабл низ дастаи мунтахаби Тоҷикистон дар ин мусобиқа зинаи 8-ум ва соли гузашта бошад, зинаи 11-умро ишғол намуда буд.

Дар бозии финалии ин мусобиқа дастаи Ҷумҳурии Африқои Ҷанубӣ бо ҳисоби 2 бар 1 дастаи Финландияро шикаст дода, ба Ҷоми Иттиҳод соҳиб шуд. Дар вохӯрӣ барои ҷойи сеюм дастаи Беларус бар тими Туркманистон бо ҳисоби 4 бар 0 ғолиб омада, зинаи сеюмро ишғол кард.