Мураббии калони мунтахаби миллии Тоҷикистон, мутахассиси украинӣ Роман Пилипчук дастаи мунтахаби ҷавонони зери 22-солаи Тоҷикистонро ба мусобиқаи байналмилалии Ҷоми Иттиҳод-2016 омода мекунад. Мусобиқа аз 16 то 24 январ дар Санкт-Петербурги Федератсияи Русия доир хоҳад шуд.

Бино ба маълумоти Федератсияи футболи Тоҷикистон, ба ситоди мураббиёни мунтахаби ҷавонони кишвар, инчунин сармураббии «Вахш»-и Қӯрғонтеппа Рустам Хоҷаев ва устоди ҳайати ҷавонони «Истиқлол»-и Душанбе Баҳодур Сӯфиев шомил гаштанд. Мураббии омодагии ҷисмонии даста, мутахассиси украинӣ Владимир Власенко таъин шуда, дарвозабонҳои мунтахаби ҷавонони Тоҷикистон зери роҳбарии Амоншо Содатсайров тамрин хоҳанд кард.

Гуфта мешавад, мусобиқаи Ҷоми Иттиҳод-2016 аз 16 то 24 январ дар шаҳри Санкт-Петербурги Федератсияи Русия доир мешавад. Дар сабқати навбатии Ҷоми Иттиҳод ҳамагӣ 8 дастаи мунтахаби ҷавонон ширкат мекунад. Қаблан шумораи иштирокчиёни ин мусобиқа 12 даста буд.

Дар сабқат бозигарони солҳои таваллудашон 1994 ва аз ин боло ҳуқуқи иштирок карданро доранд. Дар Ҷоми Иттиҳод-2016 дастаҳои мунтахаби ҷавонони Русия, Белорус, Қазоқистон, Тоҷикистон, Қирғизистон, Молдова, Эстония ва Литва иштирок мекунанд.