Сармураббии дастаи мунтахаби футболи Тоҷикистон, мутахассиси ӯзбек Усмон Тошев пеш аз вохӯрӣ байни дастаҳои мунтахаби Тоҷикистон ва Қирғизистон дар бозии даври якуми марҳилаи дуюми мусобиқаи интихобии Чемпионати ҷаҳон-2022 оид ба футбол дар гурӯҳи «F» изҳор намуд, ки дар ин вохӯрӣ вазифаи онҳо танҳо ғалаба ба даст овардан ва муваффақона идома додани дигар бозиҳои ин марҳилаи интихобӣ аст.

“Кӯшиш мекунем, ки мухлисонамонро хурсанд кунем. Даста омода аст, бо рӯҳияи қавӣ ба бозӣ бо Қирғизистон омодагӣ мегирем. Рақибро худ омӯхтем. Дастаи таҷрибанок аст ва дар мусобиқаи Ҷоми Осиё-2019 дар Амороти Муттаҳидаи Араб хуб бозӣ кард”, - оварда мешавад гуфтаҳои ӯ дар сомонаи расмии Федератсияи футболи Тоҷикистон.

Александр Крестинин, сармураббии дастаи мунтахаби футболи Қирғизистон дар навбати худ изҳор намуд, ки бозӣ бо тими Тоҷикистон хоҳ дар Душанбе ва хоҳ дар Бишкек ҷолибу шавқовар сурат мепазирад.

“Ман чунин намешуморам, ки вохӯрӣ бо Тоҷикистон бозии ҳалкунанда аст. Лаҳзаи ҳалкунанда замони анҷоми марҳилаи интихобӣ фаро мерасад. Оғози мусобиқаи интихобӣ ҳамеша ҳаяҷоновар аст, на бештар аз он”, - гуфтааст Крестинин.

Ёдрас мекунем, ки бозии даври якуми марҳилаи дуюми мусобиқаи интихобии Чемпионати ҷаҳон-2022 оид ба футбол дар гурӯҳи «F» байни дастаҳои мунтахаби Тоҷикистон ва Қирғизистон имрӯз, 5-уми сентябр дар Варзишгоҳи марказии шаҳри Душанбе баргузор мешавад. Оғози бозӣ соати 19:00.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.