Раиси пойтахт Рустами Эмомалӣ дар бораи баргузории Ниммарафони навбатии  XI байналмилалии Душанбе дар рӯзи 17 апрел қарор ба имзо расонид.

Ниммарафони анъанавии байнулмилалии Душанбе ба муносибати Рӯзи пойтахт гузаронида мешавад, ки ҳамасола рӯзи шанбеи сеюми моҳи апрел ҷашн гирифта мешавад.

Барои ҳавасмандсозии ғолибони ниммарафон аз буҷети шаҳр зиёда аз 493 ҳазор сомонӣ ҷудо мешавад, хабар доданд ба “Азия-Плюс” аз дафтари матбуоти шаҳрдории пойтахт.

Аз ҳамаи бародаршаҳрҳои Душанбе давандагон ба ниммарафон даъват карда мешаванд.

Аз ҷумла барои иштирок дар ин чорабинӣ ба намояндагони шаҳрҳои Лусака (Замбия), Сано (Яман), Монастир (Тунис), Лоҳур (Покистон), Клагенфурт (Австрия), Боулдер (ИМА), Ройтлинген (Олмон) даъватнома фиристода мешавад.

Ҳамчунин давандагон аз Мазори Шариф (Афғонистон), Теҳрон ва Шероз (Эрон), Санкт-Петербург (Русия), Минск (Беларус), Урумчи (Чин), Анқара (Туркия), Сямэн (Чин), Ашқобод (Туркманистон) ва Чиндао (Чин) низ даъватнома мегиранд.

Нахустин Ниммарафони байнулмилалӣ дар пойтахти Тоҷикистон ба масофаи қариб 21 километр бо иштироки варзишгарон аз 14 бародаршаҳри Душанбе ва ҳамчунин марафончиёни беҳтарини кишвар моҳи апрели соли 2010 баргузор шуда буд.

Ниммарафони Душанбе ба тақвими расмии марафонҳои байнулмилалии ҷаҳон шомил гардидааст, ки аз мақоми баланди он гувоҳӣ медиҳад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.