Душанбе. 24-уми май. «Азия-Плюс» — Дар зарфи чаҳор моҳи соли равон дар нуқтаҳои мубодилаи асъори ҷумҳурӣ ба таври нақдӣ беш аз 3 млрд. доллари ИМА хариду фурӯш шудааст.

Тавре ба ОИ «Азия-Плюс» аз Бонки миллии Тоҷикистон (БМТ) хабар доданд, бонк баҳри ба тавозун овардани ҳаҷми талабот ва пешниҳод  дар бозори пули нақдии ҷумҳурӣ моҳи апрели соли равон ба нуқтаҳои мубодилаи асъор  9,8 млн. ва дар 18 рӯзи моҳи май 10,4 млн. $ пули нақдро ба фурӯш баровардааст ва минбаъд низ дар сурати зарурат ба ин иқдом даст хоҳад зад.

Ба иттилои манбаъ, аввали моҳи равон дар нуқтаҳои мубодилаи асъори шаҳри Душанбе камбуди шадиди пули нақди доллари ИМА ба мушоҳида расида, он ба болоравии қурби он нисбати асъори миллӣ боис гардид ва танҳо дар ахири даҳаи аввали моҳи май вазъ дар бозори пули нақди пойтахт пас аз дахолати БМТ то андозае мӯътадил гардид.

Зикр гардид, ки агар дар аввали моҳи равон дар нуқтаҳои мубодилаи асъори шаҳри Душанбе арзиши 1 доллари ИМА 4,5 сомониро ташкил медод, пас дар охири даҳаи аввали моҳи май он аллакай бо нархи 4,6 сомонӣ харида мешуд.

Айни замон қурби асъори амрикоӣ дар бозори пули нақди пойтахт барои 1 доллари ИМА 4,64-4,66 сомониро ташкил медиҳад.