Дар Вазорати рушди иқтисод ва савдои Тоҷикистон маросими рӯнамои лоиҳаи ҳуҷҷатгузории рақамӣ, ки аз ҷониби ширкати «Сифат Иннотех Инвест» таҳия шудааст, баргузор гардид.

Бино ба иттилои дафтари матбуоти Вазорат, ҳукумат ба ин сохтори давлатӣ дастур дода буд, ки Консепсияи иқтисоди рақамӣ ва ҷорӣ намудани технологияҳои рақамиро дар соҳаҳои иқтисодиву иҷтимоӣ таҳия намояд.

Дастур дар қарори ҳукумат “Дар бораи ҷамъбасти натиҷаҳои рушди иҷтимоию иқтисодии Тоҷикистон дар соли 2018 ва вазифаҳо барои соли 2019”, ки охири моҳи январи соли равон қабул шуд, зикр гардида буд.

Моҳи феврал бо қарори Вазорати рушди иқтисод ва савдо “Дар бораи таъсиси гурӯҳҳои кории идоракунанда ва техникӣ оид ба таҳияи Консепсияи иқтисодиёти рақамӣ дар Тоҷикистон”, ду гурӯҳи корӣ – идоракунанда ва техникӣ таъсис дода шуд.

Барои ҳамкорӣ дар таҳияи Консепсия ташкилотҳои ҷамъиятӣ низ ба фаъолияти гурӯҳҳои корӣ ҷалб шуданд.

Дар доираи ин ҳамкорӣ ширкати «Сифат Иннотех Инвест» ба вазорат пешниҳод намуд, ки ҷиҳати кумак ба таҳияи чунин ҳуҷҷат омода аст ва ба сифати иштирокчии қисмати техникии гурӯщи корӣ шомил шуд.

Ҳадафҳои асосӣ ва беҳтарини “Иқтисоди рақамӣ” бунёди зербинои устувор ва бехатару босуръати интиқол, коркард ва захираи ҳаҷми зиёди маълумоти дастрас барои ҳамаи ташкилоту хонаводаҳо, ҳамчунин афзалияти истифодаи барномаи ватании таъминот аз ҷониби мақомоти давлатӣ, худидоракунии маҳаллӣ ва ташкилотҳо мебошанд.

ҶДММ «Сифат Иннотех Инвест» соли 2017 таъсис дода шуда, ба корҳои таҳияи лоиҳаҳои инноватсионӣ, ҷорӣ намудани технологияҳои наву муосир дар ҳалли масъалаҳо баҳри рушди иқтисоди кишвар машғул аст.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.