Мутобиқи қарори ҳукумати Тоҷикистон, ки охири моҳи июни соли равон қабул шуд, дастур дода мешавад, ки қарзҳои ҶСК “НБО Роғун” аз андоз, ҷарима ва фоизҳои онҳо назди 22 пудратчиёни асосии дар сохтмони иншооти нерӯгоҳ фаъолиятдошта аз эътибор соқит дониста шавад.

Ба сурати умум дар ҳаҷми беш аз 3,6 млн. сомонӣ (380 ҳазор доллар) қарзҳо аз андоз аз эътибор соқит гардида, дар натиҷаи чунин ҳисоббаробаркунӣ қарзи нерӯгоҳи Роғун ба онҳо ба ҳамин миқдор кам мешавад.

Дастур дода шудааст, ки маблағи мазкур ҳамчун ҳиссаи муассис (ҳукумат) дар сармояи оинномавии ҶСК "НБО Роғун" ба ҳисоб гирифта шавад.

Ба Вазорати молия ва ҶСК “НБО Роғун” супориш дода шудааст, ки бо назардошти имкониятҳои буҷети давлатӣ ҷиҳати маблағгузорӣ намудани қарзҳои боқимондаи нерӯгоҳ назди ташкилотҳои дар иншооти сохтмони неругоҳ фаъолиятдошта чораҳои зарурӣ андешанд.

Ёдрас мекунем, ки чанде қабл дар Маҷлиси умумии солонаи саҳмдорони ҶСК «НБО Роғун» ҳаҷми сармояи оинномавии ҷамъият 3 млрд. 560 млн. сомонӣ зиёд шуда, дар ҳаҷми 27 млрд. 760 млн. сомонӣ (наздики 3 млрд. доллар) тасдиқ шуд.

Қобили зикр аст, ки мавриди баҳрабардорӣ қарор гирифтани агрегати аввали нерӯгоҳи барқи обии Роғун 16 ноябри соли 2018 доир гардид. Чанде қабл ширкати украинии «Днепр-Спецгидроэнергомонтаж» хабар дод, ки гидроагрегати дуюми нерӯгоҳи Роғун аз 31 майи соли равон ба кор дароварда шуда, дар он озмоишҳо ҷараён доранд.

Барои анҷоми сохтмони нерӯгоҳи Роғун тибқи маълумоти пешакӣ, дар маҷмӯъ наздики 4 млрд. сомонӣ маблағ зарур аст. Дар нерӯгоҳ насби 6 агрегати иқтидори ҳар кадоме 600 МВт ба нақша гирифта шудааст.

Сарбанди 335 метр гиливу хокии нерӯгоҳ баландтарин чунин сарбанд дар ҷаҳон хоҳад буд. Ин иншоот ҳамасола 17 млрд. кВт/соат нерӯи барқи истеҳсол мекунад, ки дар муқоиса бо иқтидори нерӯгоҳи Норак якуним баробар зиёдтар аст.

Дар TelegramFacebookInstagramViberЯндекс.ДзенOK ва Google Новости бо мо бимонед.