Дар раванди интишори навбатии рейтинги кредитии соҳибихтиёрии Тоҷикистон муовини якуми раиси БМТ Ҷамолиддин Нуралиев 12-уми ноябр бо намояндагони Агентии рейтингии байнулмилалии “Moody’s Investors Service” вохӯрии корӣ анҷом дод.

Тибқи иттилои БМТ, дар ин мулоқот ноиби калони муовини президенти Гурӯҳи баҳодиҳии хавфҳои кишварҳои соҳибихтиёри Агентии мазкур Кристиан де Гузман ва мудири иҷроияи он Жин Фенг бо мақсади муайянсозии рейтинги кредитии Тоҷикистон ва шиносоӣ бо вазъи низоми бонкии кишвар аз рӯйи нишондиҳандаҳои соли равон иштирок доштанд.

Дар оғози вохӯрӣ Муовини якуми раиси БМТ оид ба вазъи феълии низоми бонкии ҷумҳурӣ, амалигардонии сиёсати монетарӣ ва нигоҳ доштани сатҳи таваррум дар доираи нишондиҳандаҳои пешбинишуда, самтҳои гуногуни рушд дар бахши молияи давлатӣ ва имконоти мавҷуда барои ҷалби сармоягузорӣ ба кишвар суханронӣ кардааст. 

“Новобаста ба таъсири омилҳои беруна, Тоҷикистон тавонист тайи солҳои охир устувории макроиқтисодиро таъмин намояд”, - гуфтааст Ҷамолиддин Нуралиев. Вай аз беҳтар гардидани вазъи низоми бонкӣ, аз ҷумла, таъмини даромаднокӣ, афзоиши сандуқи қарзӣ, коҳиши қарзҳои ғайрифаъол ва зиёд шудани ҷалби пасандозҳо ёдовар шудааст. Ба қавли ӯ, ин аз эътимоди аҳолӣ ба низоми бонкӣ дарак медиҳад.
Акс аз торнамои БМТ

Кристиан де Гузман ва Жин Фенг методологияи гузаронидани баҳодиҳӣ ва омилҳои асосии муайянкунии рейтингро аз рӯйи нишондиҳандаҳои суботи молиявӣ, уҳдадориҳои давлатӣ, сиёсати монетарию фискалӣ, татбиқи реҷаи ҳадафгирии таваррум, ҷой доштани хавфҳои эҳтимолӣ ва ҳолатҳои ғайричашмдошт муаррифӣ карданд.

Коршиносони “Moody’s Investors Service” гуфтанд, ки аз рӯйи методологияи нав дурнамо барои 12 моҳ пешниҳод карда мешавад ва он дар асоси нишондиҳандаҳои ироакардаи ҷониби Тоҷикистон омода мегардад.

Дар идомаи вохӯрӣ роҳбарони воҳидҳои сохтории Бонки миллии Тоҷикистон доир ба суботи молиявӣ, вазъи нишондиҳандаҳои асосии устувории молиявӣ дар низоми бонкӣ, идомаи татбиқи ислоҳот дар он, афзоиши пешниҳоди қарзҳо ба иқтисодиёт, ҳамчунин оид ба гардиши савдои хориҷӣ ва нишондиҳандаҳои алоҳидаи тавозуни пардохт маълумот доданд.

Акс аз торнамои БМТ
Дар ҷамъбаст Нуралиев таъкид дошт, ки натиҷаи баҳодиҳии рейтинги кредитии соҳибихтиёрии Тоҷикистон талаботи асосии ворид шудан ба бозорҳои байнулмилалии сармоя ба шумор рафта, дар рушди сармоягузорӣ ва ҳамкорӣ бо ташкилотҳои молиявии байнулмилалӣ, бонкҳои сармоягузорӣ ва шарикони рушд нақши мусбат дошта метавонад. Аз ин рӯ, дар раванди таҳияи рейтинги навбатӣ бояд хусусиятҳои минтақа ва кишвар, афзоиши маҷмӯи маҳсулоти дохилӣ ва саҳми бахшҳои иқтисодиёт дар он, беҳтар гардидани сатҳи даромаднокии низоми бонкӣ, таҳким ва рушди идоракунии захираҳои байнулмилалии кишвар, ислоҳоти гузаронидашуда ва нишондиҳандаҳои муҳими дигар ба инобат гирифта шавад.

Муовини якуми раиси БМТ ҳамчунин аз намояндагони “Moody’s Investors Service” даъват ба амал овард, ки дар ҷараёни баҳогузорӣ касбияти худро ба кор бурда, аз рӯйи нишондиҳандаҳои воқеӣ хулоса бароранд.

Агентии рейтингии байнулмилалии “Moody’s Investors Service” яке аз ширкатҳои бонуфузи ҷаҳонӣ ба ҳисоб рафта, рейтинги қарзии кишварҳо ва таҳлили хавфҳои онҳоро муайян мекунад.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.