Имрӯз, 20-уми феврал раисҷумҳури Тоҷикистон Эмомалӣ Раҳмон ноиби президенти Корпоратсияи байнулмилалии молиявӣ Георгина Бейкерро ба ҳузур пазируфт.

Тибқи иттилои хадамоти матбуоти сарвари давлат, дар ҷараёни мулоқот таҳкими ҳамкорӣ байни Тоҷикистон ва Корпоратсияи байнулмилалии молиявии Гурӯҳи Бонки Ҷаҳонӣ мавриди баррасӣ қарор дода шуд.

Эмомалӣ Раҳмон фаъолияти намояндагии Корпоратсияро дар Тоҷикистон қаноатбахш арзёбӣ карда, гуфтааст: “Манфиатдори рушди минбаъдаи шарикӣ бо он ҳастем”.

Ҷонибҳо масъалаҳои ҳамкориро дар соҳаҳои мухталифи рушд, пеш аз ҳама, дар соҳаҳои молия, савдо, телекоммуникатсия, агробизнес ва пешбурди фаъолияти сармоягузориву соҳибкорӣ муҳокима карданд.

1/6

Таъкид гардид, ки идомаи ҳамкорӣ дар самти ислоҳоти низоми бақайдгирии субъектҳои хоҷагидор, иҷозатномадиҳӣ ва санҷиши фаъолияти субъектҳои хоҷагидор низ барои таҳкими робитаҳо дар оянда пурсамар хоҳад буд.

Дар ҷараёни мулоқот Стратегияи миллии рушди Тоҷикистон барои давраи то соли 2030 ва таъсири омилҳои беруна ба рушди иқтисоди ҷумҳурӣ баррасӣ шуда, таъмини инкишофи бозорҳои молиявӣ, зерсохтори энергетикиву истеҳсолӣ, соҳаҳои саноат ва кишоварзӣ, маблағгузории соҳибкории хурду миёна, аз ҷумла, дар бахши кишоварзӣ, бахусус, дар ноҳияҳои дурдаст, инчунин зиёд кардани қарз барои занони соҳибкор муҳим шумурда шуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.