Раиси вилояти Суғд Раҷаббой Аҳмадзода ва раиси шаҳри Хуҷанд Маъруф Муҳаммадзода зимни як боздид аз раванди фаъолияти ҶДММ “Нассоҷи Хуҷанд” ошноӣ пайдо намуданд.

Бино ба иттилои дафтари матбуоти раиси шаҳри Хуҷанд, дар корхона бо назардошти вазъи сироятёбии сокинони кишварҳои хориҷи дуру наздик ба коронавируси COVID-19 ва бо мақсади таъмини амнияти санитарию эпидемиологии аҳолии мамлакат истеҳсоли ниқоб ва корҷомаҳои тиббӣ ба роҳ монда шудааст.

Гуфта мешавад, дар ин корхона, ки ба истеҳсоли матоъҳои хушсифати пахтагин машғул аст, айни замон 3 намуди ниқобҳои тиббӣ бо истифода аз дока ва хомсуф тайёр карда мешаванд. Алҳол дар як шабонарӯз ин корхона то 6 ҳазор дона ниқобҳои муҳофизатӣ истеҳсол намуда, истодааст, ки рӯзҳои наздик ҳаҷми истеҳсоли он бо ба роҳ мондани сехҳои нав дучанд меафзояд.

Ғайр аз ин, корхона ҳамзамон ба истеҳсоли корҷомаҳои тиббии муҳофизатӣ низ оғоз намудааст, ки истеҳсоли шабонарӯзии ин навъи маҳсулот то 200 адад мебошад.

1/4

Ба иттилои манбаъ, чанд рӯз қабл байни ин корхона ва ширкати «Белл Бимбо плюс»-и Беларус ба маблағи 68 ҳазор долларшартнома баста шуд, ки тибқи он дӯхти либоси мактабӣ барои муҳассилини макотиби ин кишвар пешбинӣ шудааст. «Белл Бимбо плюс» тасмим гирифтааст, ки либоси мактабии пахтагини босифати истеҳсоли корхоани«Нассоҷи Хуҷанд»-ро дар қаламрави Русия низ ба фурӯш гузорад.

Раиси вилоят ба роҳбарияти корхона дастур дод, ки дар баробари истеҳсоли ниқобҳои тиббӣ ва корҷомаҳои тиббии муҳофизатӣ ҳамзамон дар самти ба роҳ мондани сару либоси мактабӣ ва шиму костюми мардона тадбирҳои мушаххас андешида шавад.

Раҷаббой Аҳмадзода ҳамзамон васеъ намудани ҳаҷми истеҳсолот дар ин корхонаро талаби замон унвон намуда, супориш дод, ки дар зудтарин фурсат бо насби 200 адад мошинаҳои чокдӯзӣ барои дӯхти либоси мактабӣ ба ниёзмандони дохиливу хориҷӣ тадбирҳо фаврӣ андешида шавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.