Соли 2020 ба Тоҷикистон ба маблағи ҳудуди 56 млн доллар кумаки башардӯстона ворид гардид, хабар медиҳад Агентии омори ҷумҳурӣ. Қайд мешавад, ки кумаки мазкур бо вазни умумии қариб 23 ҳазор тонна аз ҷониби 62 кишвари саросари дунё расонида шудааст.

Кумакрасони асосӣ Чин маҳсуб меёбад, ки 37,3% аз ҳаҷми умумии кумаки башардӯстона ба ин кишвар рост меояд.

Ҳамчунин ба Тоҷикистон аз Русия (8,5%), Ӯзбекистон ва Туркия (7,6%-ӣ), Нидерланд (7,3%), Қазоқистон (3,3%), Ҳиндустон (2,6%), Кореяи Ҷанубӣ (2,5%), Дания (2,3%), Белгия ва ИМА (1,4%-ӣ), Олмон ва Финландия (1,2%-ӣ), Швейтсария (0,9%) ва дигар кишварҳо низ кумаки башардӯстона дастрас шудааст.

Қобили зикр аст, ки тайи даҳсолаи ахир Чин ба шарики асосии тиҷоративу иқтисодии Тоҷикистон табдил ёфт.

Айни замон Чин аз лиҳози сармояи гузошта ба иқтисоди Тоҷикистон пешсаф аст, ҳарчанд сармоягузориҳои аввали Чин соли 2008 сурат гирифтанд ва ин ҳам дар ҳоле буд, ки сармоягузории андӯхтаи Русия аллакай зиёда аз 920 млн долларро ташкил медоданд.

Дар зарфи даҳ соли охир ба Чин муяссар шуд, ки ба иқтисоди Тоҷикистон ба маблағи ҳудуди 1,4 млрд доллар сармоягузорӣ анҷом диҳад ва ин ҳам дар ҳолест, ки ҳаҷми сармоягузориҳои Русия ҳоло ба 1 млрд доллар нарасидааст.

Қобили зикр аст, ки Чин ба сегонаи шарикони асосии савдои ҷумҳурӣ низ шомил буда, аз рӯйи ҳаҷми гардиши молу маҳсулот пас аз Русия ва Қазоқисстон зинаи сеюмро ишғол мекунад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.