Дар мавриди ҷалби сармоягузориҳо ба идомаи сохтмони неругоҳи Роғун ҳукумати Тоҷикистон созишҳои пешакӣ ҳосил намуд, хабар дод муовини аввали вазири молияи Тоҷикистон Ҷамшед Каримзода зимни нишасти хабарӣ.

Ба гуфтаи ӯ, дар ин самт айни замон гурӯҳи махсуси ҳукумат кор мекунад.

Қаблан зикр шуда буд, ки  ҳукумат ният дорад барои идомаи сохтмони неругоҳи Роғун аз бонкҳои аврупоии Credit Suisse (Швейтсария) ва Landesbank Baden-Wuerttemberg (Олмон) 340 млн евро қарз гирад.

Барои идомаи сохтмони неругоҳи Роғун Каримзода ҷалби ҳам сармоягузории хориҷӣ ва ҳам дохилиро муҳим медонад.

Ӯ қайд кард, ки соли 2020 барои маблағгузорӣ ба ин иншоот аз ҳисоби буҷет 3,2 млрд сомонӣ (ҳудуди 290 млн доллар) ва аз ҳисоби захираҳои байнулмилалии кишвар 1 млрд сомонӣ равона шуд.

Каримзода таъкид дошт, ки соли ҷорӣ низ барои идомаи сохтмони неругоҳ тақрибан дар ҳамин сатҳ маблағгузорӣ ба нақша гирифта шудааст, аз ҷумла 2,1 млрд сомонӣ аз буҷет равона мегардад.

Тибқи маълумоти Вазорати молия, аз замони ба истифода додани ду агрегати неругоҳи Роғун (ноябри соли 2018 ва сентябри 2019) дар онҳо ба маблағи 500 млн сомонӣ 2,5 млрд кВт/соат неруи барқ истеҳол шудааст.

Дар толори мошинҳои неругоҳи Роғун дар умум насби 6 гидроагрегат бо иқтидори ҳар кадоме аз агрегатҳо 600 МВт ба нақша гирифта шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар TelegramFacebookInstagramViberЯндекс.ДзенOK ва Google Новости бо мо бимонед.