Бонки давлатии “Амонатбонк” бо Бонки давлатии рушди Чин ба маблағи 100 млн юани чинӣ ё беш аз 13,8 млн доллари ИМА созишномаи қарзӣ ба имзо расондааст, хабар медиҳад сомонаи расмии “Амонатбонк“.

Манбаъ навиштааст, ки ин созишнома рӯзи 17-уми ноябри соли ҷорӣ аз ҷониби Сироҷиддин Икромӣ, риси КВД “Бонки амонатгузории Ҷумҳурии Тоҷикистон “Амонатбонк” ва Тан Цзюн, президенти Бонки давлатии рушди Чин ба имзо расид.

Дар хабаре, ки ин ниҳод нашр кард, гуфта мешавад, ки “ҳадафи аслии ба имзо расонидани созишномаи қарзӣ ин пешниҳоди қарзҳои хурд барои рушди соҳаи кишоварзӣ, рушди соҳибкории хурду миёна, барои ворид намудани техникаву технологияҳои истеҳсоли молу маҳсулоти воридотивазкунанда, инчуни соҳибкороне, ки аз Ҷумҳурии Халқии Хитой молу маҳсулот ворид менамоянд, иборат мебошад”.

Манбаъ гуфтааст, ки тавассути ҳамкориҳо миёни “Амонатбонк” ва Бонки давлатии рушди Хитой то имрӯз беш аз 81,5 миллион доллари ИМА маблағ ҷудо гардида, дар ин замина 74 лоиҳаи мухталиф дар 36 шаҳру ноҳияи ҷумҳурӣ маблағгузорӣ гардиданд.

Аз маблағҳои мазкур 35 % фоизи онҳо барои рушди соҳаи кишоварзӣ, 46 % барои рушди соҳаи саноат ва 19 % барои дастгирии соҳибкории хурду миёна равона гардидаанд. Инчунин, ба 4200 мизоҷ қарзҳои хурд ҷудо карда шуд.

Ёдовар мешавем, ки ҳамкории ду бонк аз соли 2008-ум инҷониб дар доираи Иттиҳоди байнибонкии Созмони ҳамкории Шанхай ба роҳ монда шуда, миёни бонкҳо 10 Созишнома, аз ҷумла 9 Созишномаи қарзӣ ба маблағи 81,5 млн доллари ИМА, 1 Созишнома оид ба рушд додани ҳамкориҳои дуҷониба ва 1 Ёддошти тафоҳум оид ба бозомўзӣ намудани кормандони Амонатбонк, ба имзо расонида шудааст.

Дар Telegram, Facebook, Instagram, OK ва ВК бо мо бимонед.