Аз 1-уми июни соли ҷорӣ арзиши хадамоти КВД “Почтаи тоҷик” 10% гарон шудааст. Дар ин бора ба “Азия-Плюс” дар идораи почта хабар доданд. Давоми соли охир нархномаи почта бори дуюм тағйир меёбад. 

Ба гуфтаи масъулони почта, нархномаи нав аз ҷониби Хадамоти зиддиинҳисорӣ тасдиқ шуда, аллакай мавриди амал қарор гирифтааст.

Тибқи нархномаи нав, арзиши ирсоли номаи вазнаш то 100 гр барои аҳолӣ, вобаста ба вазну навъ, дар дохили кишвар аз 40 дирам то 1,75 сомонӣ ва ба хориҷ аз 4,40 сомонӣ то 15,20 сомонӣ муқаррар шудааст. 

Фиристодани бастаҳои вазнашон то 100 гр ба минтақаҳои Тоҷикистон аз 1,90 сомонӣ то 2,30 сомонӣ ва ба кишварҳои хориҷӣ 16,30 сомонӣ арзиш дорад.

Ба гуфтаи масъулони “Почтаи тоҷик”, ин навъи хидматрасонӣ, яъне қабули номаву бастаҳои вазнашон то 100 гр имтиёзнок буда, аз аҳолӣ бо арзиши камтар қабул мешавад. 

Фиристодани номаи вазнаш аз 100 гр то 1 кг, вобаста ба вазну навъ, дар дохили ҷумҳурӣ аз 5,10 то 18,80 сомонӣ ва ба хориҷи кишвар аз 42,90 то 141,20 сомонӣ арзиш дорад. 

Нархи ирсоли бастаҳои вазнашон аз 100 гр то 2 кг бошад, ба минтақаҳои кишвар аз 6 то 40,20 сомонӣ ва ба кишварҳои дигар аз 65, 40 то 201,70 сомонӣ аст.

Бояд дар назар дошт, ки ҳангоми ирсол ба кишварҳои хориҷӣ, вобаста ба минтақаи ирсол, таърифаҳо гуногун мешаванд ва арзиши хидматрасонӣ метавонад тағйир ёбад. Ҳамчунин, ба ин ҳисоб арзиши ҳисоббаробаробаркунии байнидавлатӣ илова мешавад.

Масалан, барои аз Тоҷикистон ба Русия фиристодани 1 кг бор, бояд 68,44 сомонӣ барои ирсоли бор ва 44,95 сомонӣ ҳаққи ҳисоббаробаркунии байнидавлатӣ, дар умум тақрибан 114 сомонӣ пардохт кард. 

Бо нархномаи навшудаи “Почтаи тоҷик” метавонед ин ҷо шинос шавед.

Имрӯз дар саросари кишвар 480 нуқтаи қабули номаву бастаҳои фаъолият дошта, “Почтаи тоҷик” ба беш аз 80 кишвари дунё муросилот мефиристад. 

Почта номаву бастаҳои вазнашон аз 20 гр то 10 кг-ро қабул мекунад ва тамоми муросилот тариқи роҳи ҳавоӣ фиристода мешаванд. Барои ирсоли бори вазнаш беш аз 10 кг арзиши дучанд ситонида мешавад.

Давоми тақрибан як соли охир аллакай бори дуюм арзиши хидматрасонии “Почтаи тоҷик” гарон мешавад. Қабалан, арзиши хадамоти почта охири моҳи марти соли 2024-ум 15% гарон шуда буд.

Бояд гуфт, “Почтаи тоҷик” қариб як сол ба Русия нома ва баста ирсол намекард ва танҳо чанде пеш дар бораи дигарбора оғоз кардани ин хадамот ба Русия хабар дод. 

Шуъбаи почта дар Тоҷикистон.
Акс аз АМИТ Ховар.

Дар ин миён, моҳи ноябри соли 2024 хонандагон бо ирсоли мактуб ба идораи “Азия-Плюс” нигаронӣ карда буданд, ки “Почтаи тоҷик” ба Русия мактуб ё ҳар гуна бори дигар равон намекунад.

Аммо он замон, Фаридун Қурбонов, директори “Почтаи тоҷик” дар суҳбати телефонӣ ин мушкилро рад карда, изҳор дошта буд, ки “мактубҳо ба Русия фиристода мешаванд”.

Ба гуфтаи муроҷиаткунандагон, дар “Почтаи тоҷик” тавсия додаанд, ки ба хадамоти хусусии “Почтаи аср” муроҷиат кунанд, аммо нархи ин почтаи хусусӣ чанд маротиба гаронтар аст. Мо он вақт кӯшиш кардем фаҳмем, ки чаро почтаи давлатӣ ин хидматрасониро иҷро карда наметавонад, аммо почтаи хусусӣ метавонад – ҷузъиётро дар ин матлаб мутолиа кунед.

Дертар, моҳи январи соли ҷорӣ, Исфандиёри Саъдулло, раиси нави Хадамоти алоқа тасдиқ кард, ки ҳоло  “Почтаи тоҷик” ба Русия мактуб ё бор намефиристад ва гуфт, ки байни ин корхона ва "Почтаи Русия" “баъзе мушкилот” ва “ихтилофи назар” вуҷуд дорад.

Дар Telegram, Facebook, Instagram, OK ва ВК бо мо бимонед.