Дар яке аз кӯчаҳои канори шаҳраки Данғараи вилояти Хатлон як ҷавонзани модари се фарзанд шавҳарашро ба ҳалокат расонид.

Тавре ба ОИ «Азия-Плюс» як манбаъ аз мақомоти ҳифзи ҳуқуқ хабар дод, зани гумонбаршуда дастони шавҳарашро баста, ба сару танаш керосин мерезад ва ӯро оташ мезанад. «Ба эҳтимоли ҳамсоягон, ин куштор аз рашк сурат гирифтааст, зеро қабл аз ин амал зан дидааст, ки чӣ гуна ҳамсараш бо як зане, ки дар маҳалла сабукпояш мепиндоранд, суҳбат доштааст», - гуфт сарчашмаи хабар.

Бино ба маълумоти дармонгоҳи бемориҳои рӯҳӣ, ин зан каме бемории рӯҳӣ дошта, таҳти назорат ва муолиҷаи табибони равоншинос қарор доштааст, вале ба бистарӣ намудани ӯ эҳтиёҷе набудааст.