Бар асари ҳодисаҳои садамаи нақлиёт, ки рӯзҳои истироҳати ҳафтаи спаришуда рух доданд, 10 нафар ба ҳалкоат расиданд.

Бино ба маълумоти дафтари матбуоти ВКД ҶТ, бар асари садамаи нақлиёт, ки рӯзи 29 январ дар ағбаи Фахрободи роҳи Душанбе - Қӯрғонтеппа рух дод, худи ронанда ва мусофиронаш: чор нафар ҷавонони аз 26 то 28-солаи сокинони шаҳри Душанбе ҷароҳатҳои гуногуни ҷисмонӣ бардошта, дар ҷойи ҳодиса ба ҳалокат расидаанд.

Гуфта мешавад, рӯзи 28-уми январ бар асари ба ҳамдигар бархӯрдани автомашинаи тамғаи “Мерседес-Бенс” бо автомашинаи тамғаи “Мерседес-Бенс” дар шаҳри Конибодом ронандаҳои ҳар ду автомашина марди 48-солаи сокини ноҳияи Исфара ва марди 21-солаи сокини шаҳри Конибодом ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд. Мусофирони автомашинаҳо: ду нафар ҷавондухтари 20-солаи сокинони шаҳри Исфара, марди 43-солаи сокини ноҳияи Б.Ғафуров, марди 21-солаи сокини шаҳри Конибодом, марди 56-сола ва зани 46-солаи сокинони шаҳри Исфара ҷароҳатҳои гуногуни ҷисмонӣ бардошта, дар беморхона бистарӣ шудаанд.

Шоми ҳамин рӯз ронандаи автомашинаи тамғаи “Опел-Вектра”, марди 21-солаи сокини шаҳри Сарбанд ҳангоми ҳаракат дар ҳудуди ҷамоати деҳоти Бустонқалъаи ноҳияи Бохтар бехатарии ҳаракат дар роҳро таъмин карда натавониста, ба автомашинаи тамғаи “Опел-Астра”, таҳти идораи ронанда, марди 24-солаи сокини шаҳри Кӯлоб бархӯрдааст, ки дар натиҷа, мусофири автомашинаи тамғаи “Опел-Астра” марди 21-солаи сокини ноҳияи Данғара ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. Ронандаи «Опел-Астра» ҷароҳати ҷисмонӣ бардошта, дар беморхона бистарӣ шудааст.

Зимнан зикр мегардад, ки рӯзи 29-уми январ ронандаи автомашинаи тамғаи “Тойота-Камри”, марди 22-солаи сокини шаҳри Ваҳдат ҳангоми ҳаракат аз самти ҷамоати деҳоти Ромит ба самти шаҳри Ваҳдат, дар ҳудуди деҳаи Чӯянгарон аз уҳдаи идораи воситаи нақлиёт набаромада, ба бетони канори роҳ бархӯрдааст, ки дар натиҷа, мусофири автомашинаи мазкур марди 24-солаи сокини шаҳри Ваҳдат ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. Худи ронанда ҷароҳати ҷисмонӣ бардошта, дар беморхона бистарӣ гаштааст.