Дар Конибодом марди 32-сола падари 76-солаашро дар ҳавлии истиқоматӣ латукӯб кардааст, ки дар натиҷа пирамард ҷароҳати вазнини ҷисмонӣ бардошта, дар беморхона бистарӣ шудааст.

Тибқи иттилои маркази матбуоти ВКД, ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 32-солаи сокини шаҳри Конибодом бо гумони қасдан расонидани зарари вазнин ба саломатӣ дастгир карда шуд.

Ҳамзамон ВКД хабар медиҳад, ки марди 19-солаи сокини маҳаллаи Фирдавсии шаҳри Кӯлоб дастгир шудааст. Гуфта мешавад, ки ӯ бо марди 22-солаи сокини ҳамин шаҳр ҷанҷол карда, бо корди хонагӣ ду маротиба ба рони пойи чапаш задааст. Дар натиҷа ҷабрдида ҷароҳати вазнини ҷисмонӣ бардошта, дар беморхона бистарӣ шудааст.

Ҳамин тариқ, ба ШВКД-2 дар ноҳияи Шоҳмансур бо ариза марди 30-солаи сокини кӯчаи Айнии пойтахт муроҷиат кардааст, ки 17-уми ноябр, тахминан соати 22:00 дар назди бозорча марди 35-солаи сокини ноҳияи Рӯдакӣ дар ҳолати мастӣ бо ӯ муноқиша намуда, бо корд 1 маротиба ба дасти чапаш задааст. Ҷабрдида захми сабук бардоштааст.

Аз рӯйи ҳодисаҳои мазкур тафтишот идома дорад.