Дар минтақаи шимоли Тоҷикистон коргарон, шаҳрвандони Чини “Ширкати саноатӣ-кӯҳии Тоҷикистону Чин” гирдиҳамоӣ барпо карданд.

Дар шуъбаи робита бо ҷоемаи “Ширкати саноатӣ-кӯҳии Тоҷикистону Чин” ба “Азия-Плюс” хабар доданд, ки эътироз рӯзи 20 май дарҳол баъди аз Чин омадани ҳавопаймо бо кумаки башардӯстона оғоз гардидааст.

“Бо ҳавопаймое, ки ба Душанбе кумак овард, онҳо ба Чин баргаштан мехостанд. Лекин ин кор ғайриимкон аст, чунки барои фиристодани онҳо мо бояд аз Чин иҷоза гирем. Лекин иҷоза набуд. Айни замон ҳамааш хуб аст, ҳамаи коргарон ба кор машғул буда, ҳеҷ мушкилие нест”, - изҳор доштанд дар ширкат.

Дар сафорати  Чин дар Тоҷикистон ба “Азия-Плюс” изҳор намуданд, ки дар бораи гирдиҳамоӣ онҳо алҳол маълумоти саҳеҳ дар даст надоранд.

“Бо расидани хабари муътамад, мо дар ин бора маълумот медиҳем”, - гуфтанд дар намояндагии дипломатӣ.

Дар ҳамин ҳол, тибқи маълумоти манбаи “Азия-Плюс” дар РВКД вилояти Суғд, дар шаҳраки Зарнисор (Олтин Топкани пешина) наздики 60 нафар коргарони чинии “Ширкати саноатӣ-кӯҳии Тоҷикистону Чин” бо талаби пардохти саривақтии маош назди дафтари асосии кории ширкат ҷамъ омадаанд. Манбаъ қайд кард, ки онҳо барои он эътироз кардаанд, ки 8 моҳ инҷониб маош нагирифтаанд.

“Маъмурияти корхона ба хотири пешгирии минбаъд шиддат гирифтаи вазъ,  аз милитсия ёрӣ пурсида, гурӯҳи кормандони Дастаи таъиноти махсуси милиса (ОМОН)-и маҳаллӣ ба ҷойи ҳодиса сафарбар шуд. Барои пароканда кардани чамъомадагон кормандони милитсия ба ҳаво тир холӣ карданд. Ҳеҷ кас захмӣ ё кушта нашудааст”, - хабар дод манбаъ.

Дар навори видеоии дар шабакаҳои иҷтимоӣ нашршуда дида мешавад, ки эътирозгарон сангпартоӣ мекунанд...

дар видеои баъди гирдиҳамоӣ дар қаламрави корхона шишаҳои шикастаро ҷамъоварӣ мекунанд.

Дар РВКД ҳамчунин иттилоъ доданд, ки оид ба ин далел парвандаи ҷиноятӣ ё маъмурӣ боз нашудааст.

Миёни эътирозгарон шаҳрвандони Тоҷикистон ҳузур надоштанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.