Сокини 34-солаи қаблан бо моддаи 244 КҶ ҶТ маҳкумшудаи пойтахт ба гумони даст доштан дар куштор боздошт шуд.

Бино ба иттилои маркази матбуоти ВКД Тоҷикистон, шоми рӯзи 7-уми июл ӯ дар ҳолати мастӣ бо апааш, зани 36-солаи сокини пойтахт ҷангу ҷанҷол карда, 2 маротиба бо дастонаш ба сару рӯи ҷабрдида задааст, ки дар натиҷа марҳум ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.

Гуфта мешавад, аз рӯи ҳодисаи мазкур тафтишот идома дорад.

Инчунин ҳамин рӯз дар шаҳри Исфара сокини маҳаллӣ ду касро бо корд захмӣ кардааст. Марди 51-солаи сокини ҷамоати деҳоти Шаҳраки шаҳри Исфара бо гумони қасдан расонидани зарари вазнин ба саломатӣ дастгир карда шудааст.

Ба иттилои манбаъ, номбурда дар ҳудуди заминҳои хоҷагии деҳқонии ҷамоати деҳоти Шаҳрак бо ҳамсояаш марди 54-сола ва писараш марди 30-солаи сокини ҷамоати деҳоти мазкур вохӯрда, зимни муноқиша ба шиками ҷабрдида ва  тарафи қафаси синаи чапи писараш бо корд зарба задааст, ки дар натиҷа ҷабрдидагон ҷароҳатҳои вазнини ҷисмонӣ бардоштаанд.

Нисбати гумонбаршаванда парвандаи ҷиноятӣ бо моддаи 110 қисми 2 Кодекси ҷиноятии Тоҷикистон оғоз карда шуда, тафтишот идома дорад.

Ёдрас мекунем, ки тибқи маълумоти омори расмӣ, моҳи май ҳодисаҳои сабти ҷиноятҳое чун одамкушӣ, дуздӣ дар манзилҳо ва роҳзанӣ дар ҷумҳурӣ зиёд шуд. Дар ин давра 283 ҷиноятҳои вазнин содир шудаанд, ки дар қиёс бо моҳи майи соли гузашта 126 чунин ҷиноят камтар мебошад.

Дар муқоиса бо ҳамин давраи соли гузашта моҳи майи имсол шумори ҳодисаҳои куштор ва суиқасд ба он ба миқдори 62%, дуздӣ дар манзилҳо - 35% ва роҳзанӣ - 75% афзудааст.

Моҳи май инчунин сабти ҳодисаҳои авбошӣ (5%) ва далелҳои дуздӣ дар умум (13%) зиёд шуда, дар ҳамин ҳол, сабти ҳодисаҳои ғоратгарӣ, қасдан расонидани зарари вазнин ба саломатӣ, қаллобӣ, ҷиноятҳои марбут ба маводи нашъаовар, вайрон кардани қоидаҳои бехатарии ҳаракат дар роҳ, порагирӣ кам шудааст.

Моҳи майи соли ҷорӣ ба сурати умум 1,5 ҳазор ҷиноятҳои гуногун ба қайд гирифта шудааст, ки нисбат ба ҳамин давраи соли пешин 12,4% камтар аст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.