Ба гумони иштирок дар ҳодисаи муноқиша бо типарронӣ нимаи моҳи март дар шаҳри Бохтар (собиқ Қӯрғонтеппа) 14 нафар боздошт шудаанд.

Тавре ба “Азия-Плюс” як манбаъ аз мақомоти ҳифзи ҳуқуқи вилояти Хатлон хабар дод, аз рӯи далели ҳодисаи муноқиша бо тирпааронӣ, ки шоми 17 март дар Бохтар  рух дод, мутобиқи моддаҳои 195 (Ғайриқонунӣ соҳиб шудан,  ба дигарон додан, ба соҳибияти каси дигар додан,  нигоҳ доштан, интиқол додан гирифта гаштани яроқ,  лавозимоти ҷангӣ,  моддаҳои тарканда ва воситаҳои таркиш) ва қисми 3-и моддаи 237 (Авбошӣ)-и Кодекси ҷиноятии ҶТ парвнадаи ҷиноятӣ боз шудааст.

Бино ба гуфтаи манбаъ, миёни боздоштшудагон сардори шуъбаи кофтукови ҷиноятии ШВКД шаҳри Бохтар Довар Солеҳов ва бародари ӯ Масрур Солеҳов – роҳбари яке аз воҳидҳои Вазорати нақлиёт дар минтақаи Бохтари вилояти Хатлон ҳузур доранд. Ҳамчунин аъзои як оила – 4 бародарон Султоновҳо, сокинони шаҳри Сарбанд низ боздошт шудаанд.

Дар бораи боқимонда боздоштшудагон ва сабаби сар задани муноқиша манбаъ маълумот надод.

Дар ҳамин ҳол, як манбаи дигари “Азия-Плюс” дар низоми судӣ хабар дод, ки дар доираи ин парвандаи ҷиноятӣ 16 нафар ба ҷавобгарии ҷиноятӣ ҷалб шудаанд, ки 13 нафарашон дар тавқифгоҳи муваққатӣ (СИЗО) ва боз 3 нафар бо сабаби ҷароҳатҳои гуногун бардоштан, дар муолиҷа қарор доранд.

Ҳарду манбаъ илова намуданд, ки барои тафтиши ин ҳодиса аз ҳисоби кормандони прокуратура, милитсия ва КДАМ таҳти роҳбарии Прокуратураи генералии кишвар гурӯҳи тафтишотӣ таъсис дода шудааст.

Ёдрас мекунем, ки шоми рӯзи 17 март ҷанҷол байни ду гурӯҳ дар мавзеи назди бозори “Ҳоҷӣ Шариф”-и шаҳри Бохтар ба тирпарронӣ бадал шуд. Муноқиша гӯё барои қарзи пулӣ сар зада, лекин дар бораи кадом қарзҳо сухан меравад, маълум нест. Дар натиҷа яке аз иштирокчиёни муноқиша – сокини маҳаллӣ Бахтовар Саъдуллоев аз силоҳи пневматикӣ захм гирифт.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.